Türkiyə avtonom pilotsuz döyüş təyyarələri ilə regional balansları dəyişdi
Türkiyənin müdafiə sənayesində əldə etdiyi son nailiyyətləri dünyanın diqqət mərkəzindədir. Nəşrlərdə qeyd olunur ki, Ankaranın istehsal etdiyi avtonom pilotsuz döyüş təyyarələri (PUA) təkcə texnoloji yenilik deyil, eyni zamanda regional və qlobal hərbi balanslara real təsir göstərən amilə çevrilib.
Crossmedia.az bu barədə İsrail mətbuatına istinadən xəbər verir. Türkiyə PUA-ları süni intellekt elementləri, yüksək dəqiqlikli zərbə imkanları və minimum insan müdaxiləsi ilə fəaliyyət göstərmə xüsusiyyətləri sayəsində müasir müharibə anlayışını dəyişir. İsrailli hərbi analitiklərin fikrincə, bu texnologiyalar Türkiyəyə həm operativ çeviklik, həm də strateji üstünlük qazandırır.
Mətbuatda xüsusi olaraq qeyd edilir ki, Türkiyənin avtonom sistemləri ənənəvi hava hücum vasitələri ilə müqayisədə daha ucuz, effektiv və risk baxımından daha təhlükəsizdir. Bu isə Ankaranın regional münaqişələrdə və beynəlxalq təhlükəsizlik arxitekturasında rolunu gücləndirir. İsrail mediası hesab edir ki, Türkiyə artıq yalnız PUA istehsalçısı deyil, PUA doktrinasını formalaşdıran ölkələrdən biri kimi çıxış edir.
Məqalələrdə həmçinin bildirilir ki, Türkiyə istehsalı olan pilotsuz döyüş təyyarələrinin müxtəlif ölkələr tərəfindən alınması və döyüş şəraitində sınaqdan çıxması bu texnologiyalara olan etimadı daha da artırıb. Bu tendensiya isə Yaxın Şərqdə, Qafqazda və digər strateji bölgələrdə hərbi planlamalara yenidən baxılmasına səbəb olur.
Sevinc Yarməmmədova
17:03 08.01.2026
Oxunuş sayı: 2219
