Google Rusiyadan serverlərini çıxarır: Provayderlərə təcili məktub göndərildi
ABŞ-nin texnologiya nəhəngi Google Rusiyadakı internet provayderlərinə müraciət edərək Dell R720 tipli keşləmə serverlərini istismar müddətinin başa çatması səbəbilə geri götürməyi planlaşdırdığını bildirib.
Crossmedia.az xəbər verir ki, bu barədə RBC xəbər agentliyi məlumat yayıb.
Məktubda söhbət istifadəçilər üçün məzmunun daha sürətli çatdırılmasını təmin edən Google Global Cache sistemi çərçivəsində quraşdırılmış serverlərdən gedir. Google bu serverləri dünyanın müxtəlif ölkələrində, o cümlədən 2022-ci ilə qədər Rusiyada yerli rabitə operatorları ilə əməkdaşlıq əsasında yerləşdirib.
Qeyd edək ki, həmin avadanlıqlar internet istifadəçiləri arasında ən çox tələb olunan Google məzmununu yaddaşda saxlayıb
Məlumata görə , Google daha sonra göndərdiyi yenilənmiş məktubda provayderlərdən serverlərin şəbəkədən ayrılmasını, server raflarından çıxarılmasını və götürülməsi üçün ünvanın təqdim edilməsini xahiş edib.
Məlumata əsasən, bu qərar serverlərin texniki istismar müddətinin başa çatması ilə bağlıdır. Google hələlik məsələ ilə bağlı rəsmi açıqlama verməyib.
Fatimə Məmmədova
09:50 27.12.2025
Oxunuş sayı: 5174
