Ukrayna "saman çöpündən yapışacaq?": Zelenskinin çətin qərarı
Rusiya - Ukrayna müharibəsi artıq təkcə cəbhə xəttində deyil, siyasi masalarda da taleyüklü mərhələyə daxil olub. Döyüşlərin davam etdiyi, ölkənin böyük hissəsində təhlükəsizlik risklərinin qalmaqda olduğu bir vaxtda Kiyevdən prezident seçkilərinin keçirilməsinin tələb olunması beynəlxalq münasibətlərdə ciddi suallar doğurur. ABŞ Prezidenti Donald Trampın bu istiqamətdə irəli sürdüyü çağırış müharibənin dayandırılmasından daha çox, Ukraynanın daxili siyasi sisteminə yönəlmiş təzyiq kimi qiymətləndirilir və prosesin arxasında hansı strateji məqsədlərin dayandığı müzakirə olunur.
Politoloq Elxan Şahinoğlu davam edən müharibənin, o cümlədən Ukraynanın gələcək taleyi ilə bağlı proqnozlarını Crossmedia.az-la bölüşüb: "Hazırda Ukrayna ərazisində döyüşlər davam edir. ABŞ Prezidenti Donald Trampın son tələbi isə ondan ibarətdir ki, ukraynalı həmkarı Volodimir Zelenski ölkədə prezident seçkilərinə getsin. Müharibə gedən bir ölkədə seçki keçirmək, təbii ki, son dərəcə çətindir. Lakin Zelenski müəyyən mənada buna razılaşa bilər. Bunun üçün isə ölkədə sabitlik və təhlükəsizlik mühiti formalaşmalıdır. Bu sabitliyin yaradılması üçün Rusiya ilə müəyyən razılaşmalar olmalıdır. Moskvanın buna razılaşıb-razılaşmayacağı hələ də bəlli deyil. Bu səbəbdən plan üzrə müzakirələr davam edir. Tramp hər nə qədər ilin sonuna qədər vaxt qoyduğunu desə də, əvvəlki təşəbbüslərinin çoxu da vaxt məhdudiyyəti qoyulmasına baxmayaraq reallaşmamışdı. Əgər təqdim olunan plan Ukraynanın maraqlarını təmin etməyəcək, ərazi itkiləri ilə nəticələnəcəkdisə, Kiyev üçün bu razılaşmanı qəbul etmək son dərəcə problematik olacaq. Avropa İttifaqı isə ehtimal ki, Ukraynanı dəstəkləməkdə davam edəcək”.
Ayhan
14:15 15.12.2025
Oxunuş sayı: 1478
