Qərbi Kaspi tələbələrinin “IDDA Hackathon 1”də böyük nailiyyəti
IDDA və Tenity tərəfindən təşkil olunan “IDDA Hackathon 1” 14–16 noyabr 2025-ci il tarixlərində Bakıda keçirilən 48 saatlıq fintech innovasiya yarışı olaraq diqqət çəkir.
Crossmedia.az xəbər verir ki, Hackatonda tələbələr, yeni təşəbbüskarlar və texnologiya həvəskarları komanda şəklində bir araya gələrək MVP-lər hazırlayıb, ideyalarını təqdim edib və mükafatlar, həmçinin inkubasiya imkanları uğrunda mübarizə aparıblar.
Yarış Azərbaycan üzrə ən istedadlı gəncləri bir araya gətirərək fintech və rəqəmsal transformasiya sahəsində innovativ həllərin hazırlanmasını təşviq edib.
Qərbi Kaspi Universiteti hackatonda iki komanda ilə təmsil olunub: “NextAura” və “Labrix”.
Komandalardan “Labrix” yüksək nəticə göstərərək yarışmada 2-ci yerə layiq görülüb. Komanda üzvləri: Tuncay Əliyev, Aysu Məhərrəmova və Mübariz Hüseynzadə. Münsiflər heyətinin qiymətləndirməsinə əsasən, komandaya 1500 ABŞ dolları məbləğində mükafat təqdim olunub.
Komandanın fintech həlli sayğaclardan alınan məlumatları AZN ilə göstərən mobil tətbiq, Telegram bot və vebsayt üzərində qurulub. Layihənin əsas məqsədi istifadəçilərə enerji, su və qaz sərfiyyatını real vaxtda izləmək və qənaət imkanlarını göstərməkdir. Bu həll sayəsində istifadəçilər resurslarını daha səmərəli idarə edə, xərcləri isə dəqiq şəkildə görərək qənaət edə bilirlər.
Bu nailiyyət universitet tələbələrinin innovasiya və texnologiya sahəsində artan aktivliyinin və peşəkar yanaşmasının növbəti göstəricisidir.
18:19 20.11.2025
Oxunuş sayı: 2569
