ADNSU rəhbərliyi və nümayəndə heyəti Zəfər Günü ərəfəsində şəhid məzunların ailələrini ziyarət edib
Azərbaycan Dövlət Neft və Sənaye Universitetinin (ADNSU) rektoru dosent Rüfət Əzizov və universitetin nümayəndə heyəti 44 günlük Vətən müharibəsində şəhid olmuş universitet məzunlarının ailələrini ziyarət edib.
Crossmedia.az xəbər verir ki, Zəfər Günü ərəfəsində keçirilən görüşlər zamanı rektor Rüfət Əzizov şəhid ailələrinin qayğı və ehtiyacları ilə maraqlanıb, Vətən müharibəsində Ali Baş Komandan İlham Əliyevin rəhbərliyi ilə Azərbaycan Ordusunun göstərdiyi qəhrəmanlıqdan danışıb. O qeyd edib ki, hərbçilərimizin, o cümlədən şəhidlərimizin göstərdiyi igidlik nəticəsində bu gün suveren Azərbaycanın hər yerində üçrəngli bayrağımız qürurla dalğalanır.
Rektor vurğulayıb ki, ADNSU şəhid məzunlarının ailələrini daim diqqətdə saxlayır və onları universitet ictimaiyyətinin ayrılmaz bir hissəsi kimi dəyərləndirir.
Universitet nümayəndələri paytaxtla yanaşı, Qazax, Ağstafa, Şəki, Oğuz, Neftçala, Salyan və digər rayonlarda yaşayan şəhid ailələrini də ziyarət edərək ADNSU kollektivi adından ehtiramlarını bildiriblər. Ziyarətlər zamanı şəhidlərin xatirə abidələri önünə gül dəstələri qoyulub.
Qeyd edək ki, Vətən müharibəsində ADNSU-nun 23 məzunu şəhidlik zirvəsinə ucalıb. Şəhid valideynləri göstərilən diqqət və hörmətə görə minnətdarlıqlarını bildirərək, övladlarının təhsil aldığı universiteti hər zaman özlərinə doğma ocaq kimi gördüklərini qeyd ediblər.
18:10 06.11.2025
Oxunuş sayı: 1753
