Azərbaycan Milli Elmlər Akademiyası bizim mənəvi tərəfdaşımızdır, biz mütəmadi olaraq mədəniyyət, ədəbiyyat, irs sahələrində müştərək layihələr həyata keçiririk. Həmçinin əməkdaşlığın bir istiqaməti tarix-memarlıq abidələridir. Bundan əlavə, layihələr Azərbaycanın işğaldan azad olunmuş ərazilərində, Qarabağ bölgəsində həyata keçirilir. Burada bərpa və yenidənqurma işlərinə dəstək veririk.
Crossmedia.az xəbər verir ki, bu sözləri Beynəlxalq Türk Mədəniyyəti Təşkilatının (TÜRKSOY) Baş katibi, Qırğız Respublikasının Əməkdar mədəniyyət xadimi və Xalq yazıçısı Sultan Raev deyib. O, AMEA ilə gələcək əməkdaşlığın ədəbi və mədəni irsin öyrənilməsi sahəsində davam etdiriləcəyini bildirib: “Hazırda biz petroqliflərə dair böyük layihə üzərində işləyirik. Hesab edirəm ki, petroqliflər insan dühasının ilk yaradıcılıq sahələrindən biridir, faktiki olaraq, petroqliflər türk xalqlarının ortaq köklərinin nə dərəcədə dərin olduğunu sübut edən təsviri sənətin təməllərindən biridir. Əcdadlarımızın yaratdıqları qayaüstü rəsmlər bütün dünyada geniş müzakirə edilir. Bu gün petroqliflərin müasir texnologiyalar vasitəsilə öyrənilməsi, onların elmi şərhi böyük aktuallıq kəsb edir, çünki petroqliflər sakral, mənəvi məna daşıyır. Həmçinin nəzərə almaq lazımdır ki, petroqliflər zamanla deformasiyaya məruz qalır. Buna görə sözügedən abidələrin konservasiyasına dair tədbirlər də böyük əhəmiyyət kəsb edir”.
TÜRKSOY-un hazırda altıcildlik üzərində işlədiyini söyləyən S.Raev deyib: “Nəşrin hər cildi Türk dünyasının bir ölkəsinin petroqliflərinə həsr olunacaq. Bu, yalnız Türk dünyası üçün deyil, ümumbəşəri əhəmiyyəti ilə fərqlənən genişmiqyaslı layihədir. Bizim tərəfdaşlarımız əsasən elmlər akademiyaları, o cümlədən AMEA-dır. Elmi qurumların rəhbərləri layihədə iştiraklarını artıq təsdiqləyib. Sözügedən təşəbbüs TÜRKSOY-un və Türk dünyasının elmlər akademiyalarının bu məsələnin öyrənilməsinə dəyərli töhfəsi olacaq”.
