Finlandiyada Zəfər Günü: Milli birlik və qələbənin anımı
Finlandiyanın paytaxtı Helsinkidəki “Epicenter” mərkəzində Azərbaycan Respublikasının Diasporla İş üzrə Dövlət Komitəsinin tabeliyindəki Azərbaycan Diasporuna Dəstək Fondunun və “Azər-Türk Gənclər” Təşkilatının birgə təşəbbüsü, Azərbaycan Evinin təşkilatçılığı ilə Zəfər Gününə həsr olunan “Şanlı Zəfər” adlı tədbir keçirilib.
Crossmedia.az xəbər verir ki,tədbirdə Azərbaycan icmasının üzvləri ilə yanaşı Türkiyə, Pakistan, İsveç və digər ölkələrin diplomatik nümayəndəliklərinin əməkdaşları, diaspor təmsilçiləri iştirak ediblər.
Əvvəldə Azərbaycan Respublikasının Dövlət Himni səsləndirilib, Vətənin azadlığı və ərazi bütövlüyü uğrunda canından keçən şəhidlərin əziz xatirəsi bir dəqiqəlik sükutla yad olunub.
Helsinki Azərbaycan Evinin rəhbəri Ülviyyə Cabbarova çıxışında Zəfər Gününün xalqımız üçün tarixi və mənəvi əhəmiyyətindən danışıb. O, 8 Noyabrı həm qələbənin, həm də milli birliyin və xalqın sarsılmaz iradəsinin rəmzi olaraq qiymətləndirib.
Çıxışlarda Azərbaycan xalqının birliyi, cəsarəti və dözümlülüyü bütün dünyaya nümunə kimi göstərilib, 8 Noyabrın isə bütün Türk dünyası üçün qürur günü olduğu vurğulanıb.
44 günlük Vətən müharibəsində Azərbaycan xalqının göstərdiyi qəhrəmanlıq, fədakarlıq və milli birliyin təntənəsini əksini etdirən “Zəfər – Son işğal” adlı qısametrajlı video və Finlandiyada yaşayan azərbaycanlı gənclərin hazırladığı “Qələbə ruhu” adlı təqdimat nümayiş olunub.
Əməkdar artistlər Elçin Abbasov (tar) və Toğrul Əsədullayev (kamança), VII Muğam Televiziya Müsabiqəsinin laureatı xanəndə Rəvan Qaçayev və nağara ifaçısı Əli Məlikovun ifasında zəngin konsert proqramı sürəkli alqışlarla qarşılanıb.
Tədbirdə, həmçinin rəssam Nərminə Vəliyevanın “Güclü ruhlara ithaf – Qarabağ kolleksiyası” adlı fərdi sərgisi nümayiş olunub.
18:32 03.11.2025
Oxunuş sayı: 1762
