Rusiya- NATO müharibəsi gündəmdə: Ən azı ilin sonuna qədər...
ABŞ-nin Müharibə Araşdırmaları İnstitunun məlumatına görə, Rusiya Ukraynada müharibə bitdikdən dərhal sonra NATO-ya hücum etməyi planlaşdırır.
Qeyd olunub ki, Rusiya döyüş əməliyyatları dayandıqdan sonra əhəmiyyətli döyüş qüvvəsi əldə edəcək və bu qüvvəni tez bir zamanda Alyansın sərhədlərinə yönləndirə biləcək.
Şərqi Avropadakı müharibənin genişlənməsi zaman- zaman gündəmə gəlir. Bəziləri görə, hazırda Rusiya- NATO müharibəsinin genişlənməsi daha realdır, nəinki savaşın dayanması.
Mümkün Rusiya- NATO müharibəsi barədə Crossmedia.az-a danışan politoloq Oqtay Qasımov bildirib ki, bu hadisələrin ABŞ Prezidenti Donald Trampla rusiyalı həmkarı Vladimir Putinin Alyaskada keçirilən görüşündən sonra baş verməsi diqqət çəkir: “Bu da Avropa, o cümlədən NATO ölkələrini Rusiyaya qarşı fəaliyyətlərini koordinasiya etməsi üçün müəyyən ehtiyaclar yaradır. Doğrudur, Rusiyanın hazırda Qərbdə ələ aldığı xeyli sayda media və siyasət nümayəndələri var ki, onlar da Rusiyanın maraqlarını müdafiə etməkdədirlər. Amma Ukraynada savaşın yaxın zamanda bitəcəyi ehtimalı yüksək deyil. Nəzərə alsaq ki, Ukraynanın özünə də dəstək davam etməkdədir. Xüsusilə də ABŞ-nin son dövrlər ritorikasında dəyişiklik və raketlərin Ukraynaya verilməsi ilə bağlı səslənən bəyanatlar, aparılan müzakirələr onu deməyə əsas verir ki, ABŞ əgər Ukraynanı ciddi şəkildə dəstəkləyəcəksə, o zaman Rusiya üçün proseslərin heç də arzuladığı kimi getməyəcəyi aydındır. O baxımdan burada əsas rol ABŞ-yə düşür. Rəsmi Vaşinqton özünü NATO-dakı müttəfiqlərini müdafiə edəcəksə və Avropanın müdafiə qabiliyyətlərinin artırılmasına yardım göstərəcəksə, NATO-dakı həmrəylik davam edəcəksə, əlbəttə ki, Rusiyanın birbaşa NATO ilə savaşa girməsi ehtimalı ciddi şəkildə azalacaq".
Onun sözlərinə görə, Rusiya hazırkı şəraitdə tam şəkildə NATO-ya qarşı dayanmaq resurslarına malik deyil: "Doğrudur, NATO-nun resursları da söylənilən qədər yüksək deyil və xüsusilə də hava hücumundan müdafiə sistemində boşluqların olması son dövrlərdə ciddi şəkildə ortaya çıxdı. Xüsusilə də Rusiyanın hava təxribatları və dron hücumları bunu sübut etdi. Bütün bunlara baxmayaraq, yaxın dövrlərdə – ən azı ilin sonuna qədər Ukrayna savaşının bitəcəyini düşünmürəm. Bundan başqa, Rusiya və Avropanın NATO-ya üzv olan ölkələri ilə savaşı müəyyən qədər var. Amma onun 6 ay ərzində olacağı ehtimalı demək olar ki, yoxdur. Çünki Rusiya Ukraynada hədəflərinə çatmadan ikinci avantüraya girməz. Nəzərə alsaq ki, Avropa ölkələri artıq hava hücumlarından müdafiə və dronların idarə olunması ilə bağlı Ukraynanın da təcrübəsini öyrənməkdədirlər. Əgər Rusiya–NATO qarşıdurması baş verərsə, bu, əlbəttə ki, Ukrayna–Rusiya savaşından daha ciddi miqyaslı olacaq. Çünki o zaman NATO-nun nizamnaməsinin 5-ci maddəsi işə düşə bilər. Bu da digər Alyans ölkələrinin bu savaşa qoşulması ilə nəticələnər və dünya savaşına çevrilə bilər. Düşünmürəm ki, hazırkı şəraitdə nə Rusiya, nə də NATO ölkələri bunu istəyirlər və buna hazırdırlar".
Türkanə Məşədiyeva
14:05 13.10.2025
Oxunuş sayı: 21217
