Zelenski Rusiyaya qarşı müharibəni bitirmək üçün şərtini açıqladı
Ukrayna Prezidenti Volodimir Zelenski Rusiya ilə müharibənin hazırkı cəbhə xətti boyunca dondurulmasını nəzərdə tutan sülh razılaşmasını qəbul etməyə hazır olduğunu bildirib.
Crossmedia.az xəbər verir ki, Zelenski bu barədə ABŞ-nin “Fox News” telekanalına müsahibəsində danışıb.
Jurnalist Ukrayna liderindən ölkəsinin ərazisinin 75 faizini və ya daha çoxunu öz nəzarətində saxlaması, döyüşlərin isə mövcud cəbhə xəttində dayandırılması şərtilə sülh sazişinə razı olub-olmayacağını soruşub.
Zelenski suala müsbət cavab verərək bunun müharibəni başa çatdırmağın real yollarından biri olduğunu bildirib.
Bununla yanaşı, Ukrayna Prezidenti ölkə qoşunlarının Donbasın hazırda Kiyevin nəzarətində olan ərazilərindən çıxarılması ehtimalını rədd edib.
Qeyd edək ki, daha əvvəl “Axios” nəşri Rusiya Prezidenti Vladimir Putinin Ukrayna qoşunlarının Donbasdan çıxarılması müqabilində cəbhə xətti boyunca hərbi əməliyyatların dayandırılmasına razı ola biləcəyini yazmışdı.
Kremlin sözçüsü Dmitri Peskov isə əvvəlki açıqlamalarında Ukrayna qüvvələrinin Rusiyanın öz ərazisi hesab etdiyi bölgələrdən çıxarılmasını müharibənin başa çatması üçün şərt kimi göstərmişdi.
16:09 21.10.2026
Oxunuş sayı: 80
