Tramp Moskvaya dəvət olunub: Putinlə müzakirə olunacaq məsələlər açıqlanıb
ABŞ prezidenti Donald Trampın yenidən hakimiyyətə gəlməsi ABŞ-nin xarici siyasətində müəyyən dəyişikliklər etdi. Tramp hakimiyyətə gəlməzdən əvvəl dünyadakı münaqişə ocaqlarının həlli istiqamətində müəyyən addımlar atacağını və bu addımlar nəticəsində münaqişələrin həll ediləcəyini vurğulamışdı. Bununla bağlı adekvat addımlar atsa da həll prosesi olduqca gecikən məsələlər hələ də var. Rusiya-Ukrayna müharibəsi öz həllini tapmasa da Tramp bununla bağlı hələ də tərəflərlə görüşlər keçirir və həll planları təqdim edir. Rusiya prezidentinin mətbuat katibi Dmitri Peskov açıqlamasında bildirib ki, ölkə lideri Vladimir Putin Moskvada Trampla görüşməyə hazırdır. Bu görüşdə müzakirə ediləcək məsələlər və görüşün nəyə hesablandığı isə maraq doğurur.
Sözügedən təklif barədə Crossmedia.az-a danışan siyasi şərhçi Asif Nərimanlı söyləyib ki, Tramp və Putinin görüşündə müzakirə ediləcək məsələlər bəllidir: "ABŞ və Rusiya arasında Trampın hakimiyyətə gəlməsindən sonra geoiqtisadi müstəqilliklə bağlı müəyyən razılıqlar var. Strateji hədəf kimi ABŞ-nin əsas rəqibi Çindir. Trampın Rusiya ilə yaxınlaşmaq istəyi də Çinə qarşı prosesdə Rusiya-Çin ittifaqına mane olmaqdır. Digər tərəfdən iqtisadi müstəqillik və enerji sektoru məsələlərini Tramp administrasiyası Rusiya ilə işləmək istəyir. Avropa enerji bazarında həm Rusiyanın həm də ABŞ-nin hissələri var. ABŞ çalışır ki, bu hissələrin paylaşılması məsələsini öz nəzarətinə götürməkdir. ABŞ-nin Avrasiya siyasətində anlaşmaq xətti Trampın hakimiyyətə gəlməsilə daha sıx müşahidə olunur. Bunun üçün isə Ukraynada mütləq ortaq mövqe tapılmalıdır. Ona görə Tramp və Putinin əsas müzakirə mövzusu Ukrayna olacaq".
Onun sözlərinə görə, Ukrayna məsələsində hələ də heç bir razılaşma əldə edilməyib və heç bir tərəf geri çəkilmir: "Ona görə ABŞ bəzən geri çəkilərək tərəflərin razılaşmasına çalışır. Lakin hər iki tərəf cəbhədə üstünlük əldə etmək istəyir. Tramp isə geri çəkilərək tərəflərin döyüşməsinə, hansınınsa məğlub olaraq müqaviləyə məcbur olmasına çalışır. Trampın məsuliyyəti Avropanın üstünə qoyması da buna hesablanıb. Qeyd edək ki, Putinin Alyaska səfərindən sonra Trampın bu görüşə gəlmə ehtimalı daha da artıb. Bu görüş Rusiyanın istəyidir. Çünki hazırda Rusiya iqtisadi cəhətdən təcrid edilib. Trampın Rusiyaya getməsi bu baxımından Moskvaya müsbət təsir göstərə bilərlər”.
Ayhan
16:39 29.09.2025
Oxunuş sayı: 6488
