Bu, Azərbaycanın müsəlman dünyasına verdiyi böyük bir töhfədir - Deputat
Azərbaycanın xarici siyasətində daim prioritet istiqamətlərdən biri müsəlman dünyası ilə həmrəyliyin gücləndirilməsi olub. Bu yanaşma yalnız dini-mənəvi bağlılıqla məhdudlaşmır, eyni zamanda beynəlxalq hüquqa, ədalətə və humanitar prinsiplərə əsaslanır.Ölkəmiz dünyanın müxtəlif regionlarında müsəlman xalqlarını narahat edən məsələlərdə daim prinsipial mövqeyini ortaya qoyub. Fələstin məsələsinə münasibətdə də Azərbaycan ardıcıl şəkildə ədaləti, beynəlxalq qərarların icrasını və müsəlman həmrəyliyini dəstəkləyən mövqedə dayanır.
Mövzu ilə bağlı Crossmedia.az-a açıqlamasında Azərbaycan Respublikası Milli Məclisinin deputatı Ceyhun Məmmədov bildirib ki, bu, cənab Prezidentin rəhbərliyi ilə Azərbaycanın prinsipial və qətiyyətli mövqeyinin təzahürüdür:
“Bu gün Azərbaycan beynəlxalq platformalarda müsəlmanları narahat edən məsələlərə münasibət bildirir, onların hüquqlarının qorunması, dövlətlərinin möhkəmlənməsi və vəziyyətlərinin yaxşılaşması üçün müxtəlif addımlar atır. Bu baxımdan sözügedən məsələ mühüm əhəmiyyət daşıyır və biz onu daim diqqət mərkəzində saxlamalı, daha həssas mövqe nümayiş etdirməliyik. Belə problemlərin həlli istiqamətində hər zaman diqqətli olmalıyıq”.
Deputat qeyd edib ki,hazırda İsrail-Fələstin qarşıdurması davam edir:
“Bununla yanaşı, Birləşmiş Millətlər Təşkilatının bu məsələ ilə bağlı mövqeyi də mövcuddur və həmin mövqenin nəzərə alınmasına ciddi ehtiyac var. Azərbaycan da məhz bu prinsip və mövqedən çıxış edərək addımlar atır və gələcəkdə də bu istiqamətdə fəaliyyətini davam etdirəcək. BMT-nin qəbul etdiyi qərarların həyata keçirilməsi üçün ölkəmiz üzərinə düşən vəzifələri yerinə yetirir”.
Həmçinin Azərbaycan Fələstində nümayəndəlik açıb və ora nümayəndə təyin edib:
“Bakıda yerləşən Fələstin nümayəndəliyinin xərclərinin bir hissəsi də ölkəmiz tərəfindən ödənilir. Bu, Azərbaycanın müsəlman dünyasına verdiyi böyük bir töhfədir və dünya dövlətləri, xüsusilə də İslam dünyası tərəfindən yüksək qiymətləndirilir. Azərbaycanın müsəlman xalqlarını düşündürən məsələlərdə daim onların yanında olması, qardaş dəstəyini ifadə etməsi və yardımını əsirgəməməsi bu gün də davam edir və gələcəkdə də ardıcıl olaraq davam edəcəkdir”.
Fidan Xəlilova
21:13 16.09.2025
Oxunuş sayı: 1382
