Türkiyəli generalın Bakı səfəri: iki dövlətin ordu sahəsində əməkdaşlığı yeni mərhələyə keçir -AÇIQLAMA
Azərbaycan Respublikasının Prezidenti İlham Əliyev sentyabrın 15-də Şuşada Türkiyə Respublikası Silahlı Qüvvələrinin Baş Qərargah rəisi Selçuk Bayraktaroğlunu qəbul edib. Söhbət zamanı Azərbaycanın və Türkiyənin hərbi qurumları arasında qardaşlığa, strateji müttəfiqliyə əsaslanan əməkdaşlığın daha da inkişaf etdirilməsi ilə bağlı fikir mübadiləsi aparılıb. Müdafiə naziri general-polkovnik Zakir Həsənov, müdafiə nazirinin birinci müavini, Baş Qərargah rəisi general-polkovnik Kərim Vəliyev də Türkiyə Silahlı Qüvvələrinin Baş Qərargah rəisi ordu generalı Selçuk Bayraktaroğlu ilə görüşüb. Azərbaycan və Türkiyə arasında münasibətlər isə əsrlərdən bəri mövcud olan qardaşlıq, dostluq və strateji tərəfdaşlıq prinsiplərinə əsaslanır. Bu münasibətlərin ən mühüm istiqamətlərindən biri də hərbi əməkdaşlıqdır. İki ölkə arasındakı hərbi əlaqələr təkcə təhlükəsizlik sahəsində qarşılıqlı dəstəyi deyil, həm də ortaq dəyərlərə, milli maraqlara və bölgədə sülhün, sabitliyin təmin edilməsinə xidmət edir.
Məsələ ilə bağlı Crossmedia.az-a açıqlama verən millət vəkili Tənzilə Rüstəmxanlı bu əməkdaşlığın böyük önəm kəsb etdiyini qeyd edib: "Azərbaycan ilə Türkiyə arasında hərbi əməkdaşlığın əsası hələ 1990-cı illərin əvvəllərində qoyulmuşdur. Artıq 30 ildən çoxdur ki, iki qardaş ölkənin Silahlı Qüvvələri arasında qarşılıqlı etimada, dostluğa və strateji tərəfdaşlığa söykənən sıx əlaqələr mövcuddur. Bu müddət ərzində keçirilən çoxsaylı birgə hərbi təlimlər, Azərbaycan hərbçilərinin Türkiyənin nüfuzlu təlim mərkəzlərinə və ali hərbi məktəblərinə ezam olunmaları, onların peşəkar bilik və bacarıqlarının artırılması bu əməkdaşlığın ən mühüm istiqamətlərini təşkil etmişdir.
Azərbaycan Respublikasının Prezidenti cənab İlham Əliyevin tapşırığına uyğun olaraq hazırda Azərbaycan Ordusunun inkişafı Türkiyə Silahlı Qüvvələrinin modelinə uyğun şəkildə həyata keçirilir. Xüsusilə 2021-ci ildə imzalanmış “Şuşa Bəyannaməsi” bu prosesin yol xəritəsi kimi mühüm əhəmiyyət daşıyır. Bəyannamədən sonra aparılan hərbi islahatlar çərçivəsində yeni idarəetmə mexanizmlərinin tətbiqi, müasir texnologiyaların istifadəsi, silahlanmaya müxtəlif təyinatlı hərbi vasitələrin daxil edilməsi Ordumuzun əməliyyat imkanlarını əhəmiyyətli dərəcədə genişləndirmiş və döyüş qabiliyyətini daha yüksək səviyyəyə çatdırmışdır".
Deputat həmçinin bu əməkdaşlığın Azərbaycan-Türkiyə əlaqələrini yeni mərhələyə qoymasına xidmət edəcəyini qeyd edib.
"Bu istiqamətdə həyata keçirilən tədbirlərin davamı olaraq, Türkiyə Silahlı Qüvvələrinin Baş Qərargah rəisi general Səlcuq Bayraqdaroğlu Azərbaycana səfər etmişdir. Prezident İlham Əliyev onu Şuşada qəbul etmiş, həmçinin Müdafiə Nazirliyində yüksək səviyyəli görüşlər keçirilmişdir. Heç şübhəsiz ki, bu səfər Azərbaycan və Türkiyə Silahlı Qüvvələri arasında strateji müttəfiqliyə əsaslanan qardaşlıq münasibətlərinin daha da güclənməsinə, hərbi əməkdaşlığın yeni mərhələyə qədəm qoymasına xidmət edəcəkdir"- deyə o bildirib.
Elmir Heydərli
15:27 16.09.2025
Oxunuş sayı: 5947
