Makron daha bir qalmaqalla üzləşdi - ingilis kanalı onun çıxışını dayandırdı
Fransa Prezidenti Emmanuel Makronun Böyük Britaniyada kral ziyafətindəki çıxışı ətrafında diplomatik qalmaqala səbəb ola biləcək hadisə baş verib. Belə ki, "GB News" telekanalı Makronun nitqini yarımçıq kəsərək yayımı dayandırıb və bunun səbəbi kimi onun ingilis dilində danışmaqdan imtina etməsini göstərib. Telekanalın aparıcısı Patrik Kristis Fransa prezidentini nəzakətsizlikdə ittiham edərək bildirib ki, Makron ingiliscə danışmağa başlayana qədər çıxış yayımlanmayacaq. Hadisə Fransa mətbuatında ciddi rezonans doğurub və bəzi şərhçilər bunu Fransa liderinə qarşı məqsədli təxribat kimi qiymətləndiriblər.
Mövzu ilə bağlı politoloq Vaqif Hüseyn Crossmedia.az-a açıqlama verib:
“Fransa fransız dilinin qorunmasına çox önəm verən dövlətdir. Fransa prezidenti Emanuel Makron da ingilis dilini çox gözəl bilir. Bu səbəbdən burda qəribə bir şey görmürəm. İtaliya baş naziri də, digər dövlət başçıları da belədir. Hansısa görüşdə öz ana dillərində danışmaq istəyirlər. Məsələn İran prezidenti Məsud Pezeşkian türk olmasına baxmayaraq rəsmi görüşlərdə farsca danışır. Amma qeyri-rəsmilərdə türkcə. O səbəbdən Emanuel Makronun hərəkətində qəribə heçnə görmürəm”.
Ayhan
13:15 11.07.2025
Oxunuş sayı: 760
