"Rusiya parçalanacaq, çökəcək və yerində yeni, müstəqil dövlətlər yaranacaq" - ŞOK
Müasir dünyanın səssiz savaş meydanlarından biri də mediadır. O, artıq sadəcə xəbərlərin ötürücüsü deyil, düşüncələrin yönləndiricisi, fikirlərin memarı, cəmiyyətlərin ruhuna toxunan görünməz bir gücə çevrilib. Sətirlər arasında deyilənlər, ekranlarda səslənən fikirlər, qərəzlə seçilmiş başlıqlar təkcə informasiyanı deyil, ideologiyanı da daşıyır.
Son həftələrdə Rusiya mediasında Azərbaycana qarşı qərəzli və yönləndirilmiş informasiya kampaniyalarının intensivləşməsi müşahidə olunur. Bu kampaniyalar tək-tək baş verən hadisələrin təsadüfi əks olunması deyil, daha çox məqsədli, sistemli və siyasi sifarişli görünür. Azərbaycan ictimaiyyəti və ekspert dairələri bu sualla haqlı olaraq maraqlanır: “Bu kampaniyaların arxasında hansı səbəblər dayanır?”
Mövzu ilə bağlı Crossmedia.az-a danışan siyasi şərhçi Azər Həsrət bildirib ki, Rusiyanın Azərbaycana və digər müstəqil dövlətlərə qarşı bu cür yanaşmasının kökündə tarixi imperial ambisiyalar dayanır:
"Rusiya imperiyası və Sovet İttifaqı bir zamanlar böyük gücə malik idilər. İndi isə bu güc yoxdur, amma o dövrlərin təfəkkürü hələ də mövcuddur. Rusiya elitası özlərini hələ də keçmiş imperiyanın varisi kimi hiss edir və qonşu dövlətlərə qarşı təkəbbürlü mövqe tutur. Azərbaycana qarşı aparılan informasiya kampaniyaları da bu yanaşmanın təzahürüdür.”
Azər Həsrət qeyd edir ki, Rusiya bu cür davranışları ilə əslində öz zəifliyini göstərir: “Kənardan baxanda görünür ki, çöküşün astanasında olan bir imperiya son ümidlə çırpınır. Bu çırpınmalar isə günahsız insanların həyatına zərbə vurur. Əslində bu kampaniyalar Rusiyanın daxili qeyri-sabitliyinin və perspektivsizliyinin informasiya müstəvisindəki əksidir.”
Ekspert hesab edir ki, Rusiya yaxın gələcəkdə parçalanma prosesi ilə üzləşəcək və bu gün etdiyi haqsızlıqlar ona gələcəkdə ciddi şəkildə zərər verəcək: “Tarix göstərir ki, heç kim onun axarını dəyişə bilməz. Rusiya çökəcək və yerində yeni, müstəqil dövlətlər yaranacaq. İndidən düşünməlidirlər ki, o dövrdə bu yeni dövlətlərlə münasibətləri necə quracaqlar. Çünki bu gün yaratdıqları düşmənçilik sabah onların qarşısına daha böyük problemlərlə çıxacaq.”
Mehriban Yariyeva
12:40 09.07.2025
Oxunuş sayı: 918
