"Tramp Ukraynanı Rusiyanın təsir dairəsinə salmaq istəyir..." - POLİTOLOQ
ABŞ Prezidenti Donald Tramp Rusiyanın Ukraynaya qarşı müharibəsini bitirə biləcəyinə əmin olmadığını bildirib. Bu barədə "Politico" məlumat yayıb. Qəzet həmçinin bu bəyanatın onun münaqişəni tez bir zamanda bitirmək barədə əvvəlki vədləri ilə tamamilə ziddiyyət təşkil etdiyini yazıb.Tramp jurnalistlərin müharibəni bitirə biləcəyinə əmin olub-olmadığı ilə bağlı sualına "Bilmirəm. Bunun baş verib-verməyəcəyini sizə deyə bilmərəm. Bəli. Bunun baş verməsini istərdim", - deyə cavab verib.
Nəzərə almaq lazımdır ki, Tramp hələ hakimiyyətə gəlməzdən dəfələrlə müharibəni üç günə bitirə biləcəyini demişdi. Əslində onun bunun üçün səy göstərdiyi aydındır. Amma, deyəsən, artıq Tramp özü də ümidi kəsib. Əgər, doğrudan da, belədirsə, deməli, Rusiya- Ukrayna müharibəsinin yaxın vaxtda başa çatacağını gözləməyə dəyməz.
Bu barədə Crossmedia.az-a danışan politoloq Məhəmməd Əsədullazadə bildirib ki, Trampın Rusiya–Ukrayna müharibəsi ilə bağlı son açıqlamaları onun bu məsələ ilə bağlı fikirlərinin sabit olmadığını göstərir: "Düşünürəm ki, onun bəyanatlarını tam ciddi qəbul etmək düzgün olmaz. Çünki Tramp bəzən bir neçə saat ərzində belə fikrini dəyişə bilir. Tramp rusiyalı həmkarı Vladimir Putinlə telefon danışığından sonra artıq telefon diplomatiyasının da yetərli olmadığını anlamalıdır. Çünki bu cür danışıqlar, əksinə, Rusiyanın mövqeyinin möhkəmlənməsinə səbəb olur. Putinin müharibəni dayandırmaq fikrində olmadığı açıq şəkildə görünür. Tramp bundan sonra Ukrayna prezidenti Volodimir Zelenski ilə də danışıb. Güman olunur ki, bu danışıq nəticəsində Ukraynanın hava hücumundan müdafiə sistemlərinin gücləndirilməsi istiqamətində birgə addımlar atılacaq. Tramp bu telefon söhbətini “müsbət və konstruktiv” adlandırıb".
Politoloq əlavə edib ki, Tramp Braziliyada keçirilən BRİCS sammitindən sonra bu müharibəyə dair yeni mövqe açıqlayacağını bildirib: "Deyəsən, sammitdə əldə olunan nəticələrə uyğun olaraq ABŞ-nin bu məsələyə münasibətində də müəyyən dəyişikliklər ola bilər. Bu məsələdə əsas qərarlar təkcə prezident tərəfindən deyil, ABŞ Konqresi və dövlət institutları səviyyəsində verilməlidir. Ağ Ev və ABŞ Müdafiə Nazirliyi (Pentaqon) kimi qurumlar bu məsələdə əsas yönəldici qüvvə kimi çıxış etməlidir. Trampa isə müəyyən təlimatlar və tövsiyələr verilməli, onun addımlarına təsir edilməlidir. Əgər məqsəd, həqiqətən, münaqişənin nizamlanmasıdırsa, Ukraynaya tam dəstək verilməli və Rusiya danışıqlar masasına oturmağa məcbur edilməlidir. Trampın yanaşmasına qalsa, o, bu müharibədən çıxmaq və Ukraynanı Rusiyanın təsir dairəsinə buraxmaq istəyir. Amma burada əsas rolu ABŞ-nin dövlət siyasəti və strateji maraqları oynayır. Bu müharibə, əslində, təkcə Kiyevin deyil, həm də Vaşinqtonun qlobal mövqelərinə qarşı yönəlmiş Rusiya ekspansiyasıdır. Yəni, bu, Rusiyanın beynəlxalq arenada daha güclü oyunçu olmaq istəyi fonunda aparılan bir müharibədir. ABŞ isə bu təcavüzü dayandırmaq üçün sistemli və ardıcıl bir strategiya ortaya qoymalıdır.”
Mehriban Yariyeva
14:43 07.07.2025
Oxunuş sayı: 10409
