Rusiya və Şimali Koreya birlikdə yeni müharibəyə hazırlaşır - Şoyqunun səfəri...
Mübariz Göyüşlü: "... Şimali Koreyanın əsgərləri gəlib Rusiya tərəfindən Ukraynaya qarşı döyüşür"
İyunun 17-də Rusiya Təhlükəsizlik Şurasının katibi Sergey Şoyqu prezident Vladimir Putinin xüsusi tapşırığı ilə Şimali Koreyaya gedib. “İnterfaks” dövlət agentliyi Təhlükəsizlik Şurasının mətbuat xidmətinə istinadən xəbər verir ki, o, KXDR rəhbərliyi, o cümlədən ölkə lideri Kim Çen In ilə “əvvəlki səfər zamanı - iyunun 4-də əldə olunmuş razılaşmaların icrası çərçivəsində” danışıqlar aparıb.
Onların Rusiya ilə KXDR arasında 2024-cü il iyunun 19-da imzalanmış hərtərəfli strateji tərəfdaşlıq haqqında sazişə uyğun olaraq həyata keçirildiyi vurğulanır.
Bu, artıq Sergey Şoyqunun son bir ayda KXDR-ə ikinci səfəridir.
Bu cür intensiv səfərlərin arxasında nə durur?
Crossmedia.az baki-xeber.com-a istinadən xəbər verir ki, Crossmedia.az Analitik İnformasiya Portalının Baş redaktoru, Cross Media Təhlil Mərkəzinin analitiki, siyasi şərhçi Mübariz Göyüşlü bu barədə açıqlamasında bildirdiyinə görə, Rusiya Ukraynaya hücum edəndən sonra beynəlxalq aləm tərəfindən, xüsusilə də Qərb və ABŞ tərəfindən embarqolara və sanksiyalara məruz qaldı: "Demək olar ki, Rusiya dünyada təkləndi. Belə olan halda Rusiya özünə yeni müttəfiqlər axtarışına çıxdı. Bu cür axtarışların nəticələrindən biri də o oldu ki, Rusiya ötən il Şimali Koreya ilə hərtərəfli strateji müttəfiqlik müqaviləsi bağladı. Dünyada bu addım müxtəlif cür qarşılansa da, hesab edirəm ki, bu normal ikitərəfli dövlət münasibətləridir. Lakin bu iki ölkə arasında hərbi əməkdaşlıq daha yüksək səviyyədədir. Hətta hərbi əməkdaşlıq o səviyyədədir ki, Şimali Koreyanın əsgərləri gəlib Rusiya tərəfindən Ukraynaya qarşı döyüşür. Yeri gəlmişkən, Kurskın azad edilməsində Şimali Koreya hərbçilərinin xüsusi töhfəsi olub. Fikrimcə, mənfi qarşılayacağımız hal budur ki, Şimali Koreya əsgərləri cəbhədə Rusiya tərəfdən döyüşür. Yəni bir dövlətin əsgəri digər dövlətin ərazisində üçüncü dövlətə qarşı döyüşürsə, bu mənfi haldır, yolverilməzdir. Görünür, Rusiyanın Şimali Koreyaya yenə hansısa ehtiyacları yaranıb, bu, silah da, canlı qüvvə də ola bilər. Müharibə uzanır, Ukraynaya isə Avropa və ABŞ yardım edir, hərtərəfli dəstək verir. Belə bir şəraitdə Rusiya strateji müttəfiqləri, o cümlədən də Şimali Koreya ilə əməkdaşlığı daha da sıxlaşdırmaq, intensivləşdirmək istəyir. Rusiya Şimali Koreyanın hərbi arsenalı və canlı qüvvəsi hesabına öz mövqeyini gücləndirmək istəyir. Ona görə də Rusiyanın Təhlükəsizlik Şurasının katibi Sergey Şoyqu Şimali Koreyaya intensiv səfərlər edir.
Fikrimizcə, İsrailin İrana hücumundan sonra bu səfərlərin intensivliyi bir qədər də artacaq. Çünki bir tərəfdən Rusiyaya silah verən İranın başı özünə qarışıb, digər tərəfdən isə rus cəmiyyətində müharibəyə getmək istəməyən vətəndaşların saýı durmadan artır. Eyni zamanda, son günlər cəbhədə Rusiyanın canlı qüvvə və hərbi texnika itkiləri artıb. İyunun 1-də Ukrayna kəşfiyyatı tərəfindən Rusiyanın dərinliklərindəki hərbi aerodromlara təşkil edilən dron hücumları həm Rusiyaya ağir itki verdi, həm də cəmiyyət psixoloji cəhətdən sarsıldı ki, Ukraynaya qarşı vuruşmaq mənasızdır. Bu səbəbdən də indi Rusiyada vətəndaşlar 3 il əvvəlki kimi həvəslə müharibəyə yollanmır, qaçmağa üstünlük verir.
Odur ki, qarşıdakı aylarda da Rusiya dövlət rəsmilərinin Şimali Koreyaya və Çinə səfərlərinin sayının artması gözləniləndir.
Görünür, Rusiya yeni hücum əməliyyatlarına Şimalı Koreyanın hərtərəfli dəstəyi ilə başlamaq, bununla da cəbhədə dönüş yaratmaq istəyir".
12:25 20.06.2025
Oxunuş sayı: 967
