Niderlandda “erməni soyqırımı”na dair sənədə Türkiyə diasporasından sərt reaksiya
Türkiyə diasporasının Niderlanddakı nümayəndələri Avropa ölkəsinin parlamentində yaxın günlərdə Osmanlı imperiyasında 1915-ci il hadisələri mövzusunda qəbul olunmuş qərəzli sənədi sərt şəkildə tənqid ediblər.
Crossmedia.az Hürriyət nəşrinə istinadən xəbər verir ki, Niderlandda fəaliyyət göstərən diaspor təşkilatı Comité Anti-Collaboratie deputatlara açıq məktub ünvanlayaraq, "hüquqi və tarixi əsasları olmayan" addımlardan imtina etməyə çağırıb.
Məktub müəllifləri Birinci Dünya müharibəsi dövründə ermənilərin fəaliyyətləri ilə İkinci Dünya müharibəsi zamanı Niderlandda nasistlərlə fəal əməkdaşlıq edən Milli Sosialist Hərəkatı (NSB)-nin cinayətləri arasında paralellər aparıblar.
"Adısa "erməni soyqırımı" kimi çəkilən iddianı sübut edən heç bir fakt yoxdur. Bütün bunlar uydurmadır!" – deyə Comite Anti-Collaboratie təşkilatının rəhbəri Ali Çağlayan bildirib və Osmanlı ərazisində erməni silahlı dəstələrinin törətdiyi qanlı cinayətlərə diqqət çəkib.
Onun sözlərinə görə, erməni "soyqırımı" ilə bağlı beynəlxalq məhkəmə instansiyalarının heç bir qərarı mövcud deyil.
"Niderland parlamentinin deputatları, digərləri ilə yanaşı, Pərinçək İsveçrəyə qarşı işi üzrə AİHM-in qərarını, eləcə də Bernard Lyuis, Günter Levi və Castin Makkarti kimi 1915-ci il hadisələrini araşdırmış tanınmış Qərb tarixçilərinin nəticələrini nəzərə almalı idilər" – deyə Ali Çağlayan vurğulayıb və bildirib ki, parlamentlərin subyektiv qərarları tarixi reallıqları dəyişə bilməz.
"Bu cür populist addımların yeganə nəticəsi düşmənçiliyin və milli nifrətin artması ola bilər ki, bu da ictimai həmrəyliyə zərbə vurur"– deyə Comité Anti-Collaboratie rəhbəri əlavə edib.
Ali Çağlayan bildirib ki, yaxın günlərdə Niderland parlamenti qarşısında Türkiyə icmasının nümayəndələri etiraz aksiyası keçirməyi planlaşdırırlar.
Zəhra Məmmədova
20:56 19.04.2025
Oxunuş sayı: 665
