Xarici xəbərlər

ABŞ Ukrayna sülh danışıqlarından imtina edə bilər

ABŞ prezidenti Donald Trump bildirib ki, əgər Rusiya və ya Ukrayna sülh sazişinə mane olarsa, Vaşinqton danışıqlardan "vaz keçəcək".

O, sülhün konkret tarixdə əldə olunacağını gözləmədiyini, amma bunun "tezliklə" baş verməsini istədiyini deyib.

Crossmedia.az xarici mediaya istinadən bildirir ki, ABŞ dövlət katibi Marko Rubio da danışıqlarda irəliləyiş olmazsa, prosesin bir neçə gün ərzində dayandırıla biləcəyini vurğulayıb. O, ABŞ-ın daha vacib prioritetləri olduğunu bildirib.

Bu bəyanatlar Rusiya ordusunun Ukraynanın şərqində irəliləməyə davam etdiyi, Xarkiv və Sumı şəhərlərinə hücumlarda 2 nəfərin öldüyü və 100-dən çox insanın yaralandığı bir vaxtda səsləndirilib.

Trump Rusiya prezidenti Vladimir Putinlə birbaşa əlaqədə olduğunu və Ukrayna prezidenti Zelenskini sərt şəkildə tənqid etdiyini bildirib. Bu isə NATO müttəfiqləri arasında narahatlıq yaradıb.

Eyni zamanda ABŞ və Ukrayna arasında iqtisadi əməkdaşlıq çərçivəsində yeni bir "minerallar razılaşması" üzərində iş gedir. Sazişin 26 aprelə qədər yekunlaşdırılması planlaşdırılır.

Ukrayna isə bu razılaşma vasitəsilə ABŞ-dan təhlükəsizlik zəmanəti almağa çalışır. Lakin Ağ Ev indiyədək belə bir təminat verməyib.

Fatimə Nəbiyeva

🖨 Çap et

18:35 19.04.2025

Oxunuş sayı: 884