BTQ-nin hədəfi bütün müstəmləkələrin azadlıq əldə etməsinə nail olmaqdır - AÇIQLAMA
Bakı Təşəbbüs Qrupu (BTQ) hər zaman dialoq və sülh yolu ilə münaqişələrin həllinə üstünlük verib. BTQ-nin icraçı direktoru Abbas Abbasovun Fransanın dənizaşırı ərazilər naziri Manuel Valsa ünvanladığı məktub bu mövqeyi bir daha vurğulayır. Məktubda kanak xalqının hüquqlarını qorumaq və Fransa hökumətinə uzun müddət yerinə yetirilməyən öhdəlikləri xatırlatmaq məqsədini əks etdirən ciddi məsələlərə toxunulub.
Abbasov 1988-ci ildə imzalanmış Matinyon sazişi çərçivəsində Fransa hökumətinin öhdəliklərini yerinə yetirməməsini tənqid edərək danışıqların nəticəyə yönəlməsinin vacibliyini vurğulayıb. O, BTQ-nin bu prosesə tərəfsiz vasitəçilik etməyə hazır olduğunu bildirib. Bununla da, Kanak xalqının etimadını və BTQ-nin beynəlxalq təcrübəsini nəzərə alaraq, Fransa hökumətinə danışıqlarda balanslı və ədalətli yanaşmanın təmin olunması üçün çağırış edib.
BTQ bu təşəbbüsü ilə yalnız Kanak xalqına deyil, eyni zamanda dünya miqyasında müstəmləkəçiliklə mübarizə aparan xalqlara da ümid və dəstək nümayiş etdirir. Abbasovun vurğuladığı kimi, təşkilat beynəlxalq hüquq normalarına əsaslanaraq tərəflər arasında dialoq və qarşılıqlı anlaşmanı gücləndirmək məqsədini güdür.
Mövzu ilə bağlı Crossmedia.az-a açıqlama verən Milli Məclisin deputatı Aydın Mirzəzadə bildirib ki, Bakı Təşəbbüs Qrupu qısa bir müddətdə yaranmasına baxmayaraq, artıq dünyanın müxtəlif bölgələrində müstəmləkə rejimində olan və milli-azadlıq uğrunda mübarizə aparan xalqlar üçün ümid mənbəyinə çevrilib: “Bakıda mütəmadi olaraq təşkil edilən tədbirlərdə həmin bölgələrin nümayəndələri, bəzən hətta yerli idarəetmə rəsmiləri də iştirak edərək, ərazilərinin dövlət müstəqilliyini elan etdiklərini bildirirlər. Bununla yanaşı, BTQ-nin məsələləri gündəmə gətirdiyinə və dəstək göstərdiyinə görə təşəkkürlərini ifadə edirlər.
BTQ-nin əsas məqsədi beynəlxalq hüquq prinsiplərinə uyğun olaraq, bütün müstəmləkələrin azadlıq əldə etməsinə nail olmaqdır. Bu baxımdan, Fransa hökumətinə edilən müraciət də tamamilə qanunauyğundur. Fransanın xüsusi bir nazirliyinin yalnız müstəmləkə bölgələrinə cavabdeh olması da bu ölkənin hələ də müstəmləkələri olduğunu etiraf etdiyinə işarədir. Fransa, BMT Təhlükəsizlik Şurasının beş daimi üzvündən biri olmaqla yanaşı, müxtəlif bölgələrdə müstəmləkə idarəçiliyini davam etdirir”.
Bu ərazilərdə təbii sərvətlərin istismarı və yerli əhalinin hüquqlarının pozulması ciddi narazılığa səbəb olur.
“BTQ Fransa hökuməti ilə həmin xalqlar arasında vasitəçi olmaq təklifini irəli sürərək dənizaşırı ərazilərin naziri ilə rəsmi əlaqə qurub. Bu ərazilərin əhalisi Fransa hökumətinə etimad göstərmir və ciddi narazılıqlar mövcuddur. Bu baxımdan, bitərəf statusa malik Bakı Təşəbbüs Qrupu vasitəçilik missiyasını həyata keçirərək həmin xalqların problemlərinin həllinə yardım edə biləcəyini vurğulayıb. Təşəbbüs doğru və yerindədir. Bu təşəbbüs, eyni zamanda, Azərbaycanın beynəlxalq arenada artan nüfuzunun göstəricisidir”,- deyə A.Mirzəzadə fikrini yekunlaşdırıb.
Nəzrin Salmanova
16:28 03.04.2025
Oxunuş sayı: 8829
