Rusiyada miqrantlara qarşı qanunlar getdikcə sərtləşdiriilir: "Azərbaycana da təsir edəcək"
Rusiyada miqrantlara qarşı qanunlar getdikcə sərtləşdiriilir. Bu, müxtəlif cür qiymətləndirilir. Bütün hallarda Rusiyanın müharibəni davam etdirdiyi bir vaxtda miqrantlara qarşı atdığı bu addım müzakirələrə səbəb olmaqdadır.
Bu barədə Crossmedia.az-a danışan iqtisad elmləri doktoru, professor, Milli Məclisin dörd çağırış deputatı Rüfət Quliyev bu prosesin tək Rusiyada, yox digər ölkələrdə də həyata keçirildiyini bildirib : "Bu proses Avropa İttifaqı ölkələrin, yəni 27 üzv ölkənin bəlkə də yarısından çoxunda baş verir. Bu problemlər üzərində müzakirələr aparılır. Əlavə olaraq bəzi Avropa ölkələri miqrantların sayının artmasına müharibə nəticəsində səbəb olduqlarını nəzərə alaraq, bu məsələni gündəmə gətirirlər. Məsələn, Fransa, Afrika ölkələrinə hərbi müdaxilələr və inqilabi proseslər apararkən, bunun nəticəsində çox sayda insan həyatını təhlükəyə ataraq qaçır. Bu da miqrant axınının artmasına səbəb olur".
Onun sözlərinə görə, miqrantlara qarşı bu cür yanaşmalar, ABŞ-də Donald Tramp hakimiyyətə gələn zaman başlanan prosesdir: "Bunun əsas səbəbi, ölkələrin miqrantlarla bağlı siyasətini tam şəkildə qura bilməmələridir. Nəticədə bu kriminogen vəziyyətin artmasına, qeyri-formal iqtisadiyyatın inkişafına və bəzən də korrupsiya mənbələrinin yaranmasına səbəb olur. Həmçinin, bəzi hallarda dövlət institutlarına təsirlər baş verir. Siyasi və iqtisadi problemlər yarananda, ölkələr bu məsələlərin həllini miqrantları öz ölkələrindən uzaqlaşdırmaqda görürlər. Bu prosesin Azərbaycana da təsiri var. Nəzərə almaq lazımdır ki, hazırda Rusiyada 2 milyondan çox azərbaycanlı miqrant yaşayır".
Çinarə Tarverdiyava
16:47 02.04.2025
Oxunuş sayı: 5825
