Fransızsayağı demokratiya: Makrondan "nümunəvi" addım
Fransada siyasi səhnənin tanınmış simalarından biri olan Marin Le Pen Paris məhkəməsinin onun seçki hüquqlarını məhdudlaşdıran qərarına qarşı apellyasiya şikayəti verməyə hazırlaşır.
Siyasətçinin vəkili Rodolph Bosselut bu barədə BFMTV telekanalına açıqlama verib. Onun sözlərinə görə, yaranmış vəziyyət qalmaqallıdır və müdafiə tərəfi susmaq niyyətində deyil.
Məlumata görə, Le Pen məhkəmənin qərarından şoka düşüb, xüsusilə də seçkilərdə iştirak qadağasının dərhal qüvvəyə minməsi onun üçün gözlənilməz olub. Qeyd edək ki, Paris məhkəməsi Marin Le Peni Avropa Parlamentinin vəsaitlərini mənimsəməkdə təqsirli bilib və ona dörd il azadlıqdan məhrumetmə cəzası kəsib. Bunun iki ili şərti olmaqla, digər iki ili elektron bilərziklə ev dustaqlığında keçəcək. Siyasətçi eyni zamanda 100 min avro cərimələnib və beş il müddətinə seçki hüquqlarından məhrum edilib. Marin Le Penin bu qərara qarşı mübarizəsi Fransa siyasi arenasında yeni müzakirələrə yol açacaq.
Makron demokratik ənənələrə zidd olaraq öz rəqiblərinin seçki hüququnu məhdudlaşdırır və onların seçkilərdə iştirakını əngəlləyir. Halbuki demokratiyanın əsas özəlliklərindən biri azad seçkilərdi. Makronun bu addımı isə göstərir ki, o, demokratiyadan danışsa da əməldə demokratik ənənələri pozur.
Bu bəradə Crossmedia.az-a Milli Məclisin deputatı Vüqar Rəhimzadə açıqlama verib.
Parlamentari bildirib ki, dünyaya hər zaman özünü “demokratiyanın beşiyi” kimi təqdim edən Fransada bu gün baş verənlər əslində bu dövlətin əsl mahiyyətini bir daha ortaya qoyur: "Fransada qanunazidd hadisələrin yaşanması, insan hüquqlarının kobud şəkildə pozulması adi hala çevrilib. Makronun rəhbərliyi dövründə Fransada siyasi plüralizm və demokratik dəyərlər bir-birinin ardınca zərbələr almaqdadır. Paris məhkəməsinin ifrat sağçı Milli Birlik fraksiyasının lideri Marin Le Pen və digər 8 deputatla bağlı qərarı da bu qəbildəndir. Bu qərar Makronun rəhbərlik etdiyi hökumətin siyasi opponentlərlə qarşı mübarizədə məhkəmə rıçaqlarından necə istifadə etdiyi ilə bağlı geniş müzakirələrə səbəb olub. Paris məhkəməsi Marin Le Peni Avropa Parlamentinin vəsaitlərinin mənimsənilməsi işində təqsirli bilərək dörd il müddətinə azadlıqdan məhrumetmə cəzası kəsib. Məhkəmənin qərarına əsasən, Le Pen bu müddətin iki ilini şərti olaraq, digər iki ilini isə ev dustaqlığında keçirəcək. O, həmçinin 2027-ci il prezident seçkilərində iştirak edə bilməyəcək".
Deputat qeyd edib, Marin Le Pen Fransanın tanınmış siyasətçilərindən biridir və 2027-ci ildə keçiriləcək prezident seçkilərində ən ciddi namizədlərdən biri sayılırdı. "Onun artan nüfuzu Makron hakimiyyətini ciddi şəkildə narahat edirdi. Belə aydın olur ki, Makron əsas rəqibinin seçkilərdə iştirakına qadağa qoyulmasına nail olmaqla siyasi rəqibini süni şəkildə mübarizədən uzaqlaşdırmağa çalışır. Makron hakimiyyətinin bu siyasəti demokratik institutlara inamı ciddi şəkildə sarsıdır. Rəsmi Parisin siyasi rəqibləri aradan qaldırmaq üçün məhkəmədən istifadə etməsi bütövlükdə seçki prosesini şübhə altına alır. Bu addım Mari Le Penin tərəfdarlarının səfərbər olması və siyasi mənzərənin radikallaşmasına səbəb ola bilər. Fransada genişmiqyaslı etiraz aksiyalarının keçiriləcəyi ilə bağlı yayılan xəbərlər də bunu təsdiqləyir".
V.Rəhimzadə vurğulayıb ki, Fransada yaşananlar demokratiya pərdələnmiş ölkənin əsl simasını, yürütdüyü siyasəti təqdim edir: "Əməldə demokratik dəyərləri maraqlarına qurban verib, üzdə "demokratiyanın beşiyi” görüntüsünü yaradan Fransada yaşananlar Makron hakimiyyətinin nə qədər riyakar siyasət həyata keçirdiyini təsdiqləyir".
Xumar Emilqızı
10:45 02.04.2025
Oxunuş sayı: 9574
