Qazaxıstanda Xocalı soyqırımı ilə bağlı anım tədbirləri keçirilib
Qazaxıstanın Almatı və Şimkənd şəhərlərində, Türküstan vilayətində Xocalı soyqırımı ilə bağlı anım tədbirləri keçirilib.
Bu barədə Crossmedia.az Diasporla İş üzrə Dövlət Komitəsinə istinadən xəbər verir.
Bildirilib ki, Almatı şəhərində fəaliyyət göstərən "Ata Yurd - Nomad" Respublika İctimai Birliyinin təşkilatçılığı ilə keçirilmiş tədbir Xocalı soyqırım qurbanlarının əziz xatirəsinin bir dəqiqəlik sükutla yad edilməsi ilə başlayıb.
Birliyin sədri Süleyman Əhmədov və Azərbaycanın Almatı şəhərindəki konsulu Anar Hüseynzadə çıxış edərək soyqırımı haqqında tədbir iştirakçılarına ətraflı məlumat veriblər. Prezident İlham Əliyevin və Birinci vitse-prezident Mehriban Əliyevanın Xocalıya səfərləri, sakinlərlə görüşləri xatırladılıb.
Xocalının artıq dirçəldiyi vurğulanıb. İnsanların rahat həyat və fəaliyyəti üçün hərtərəfli şərait yaradıldığı, doğma yurdlarına qayıdan soydaşlarımızın təhlükəsiz yaşaması, onların məşğulluğunun təmini, rifah halının yaxşılaşdırılması, ətraf mühitin mühafizəsi və bərpası istiqamətində mühüm işlər görüldüyü qeyd olunub.
Şimkənd şəhərində "Azərbaycan Mədəniyyət Mərkəzi" İctimai Birliyinin nəzdində fəaliyyət göstərən həftəsonu məktəbində Xocalı soyqırmına həsr olunmuş açıq dərs keçirilib. Məktəbin müəllimi Günel Abbasova şagirdlərə Xocalı faciəsinin tarixindən bəhs edib. Soyqırımının heç vaxt unudulmayacağını, Xocalının yenidən dirçəldiləcəyini söyləyib. Daha sonra Xocalı soyqırımına həsr edilmiş film nümayiş olunub.
Qazaxıstanın Türküstan vilayətində fəaliyyət göstərən "Qarabağ" Etnomədəni Birliyinin nəzdindəki Qarabağ məktəbində Xocalı soyqırımına həsr olunmuş açıq dərs keçirilib. Şagirdlərə Xocalı faciəsi haqqında ətraflı məlumat verilib və soyqırıma həsr olunmuş film nümayiş etdirilib.
Hazırda Xocalıda Azərbaycan Bayrağının dalğalanmasının faciə qurbanlarının qanının yerdə qalmadığının göstəricisi olduğu diqqətə çatdırılıb. Daha sonra təşkilatın sədri Ramilə Mustafayevanın rəhbərliyi ilə Sayram rayonunda tədbir keçirilib, şəhidlərimizin ruhu ehtiramla yad edilib.
17:43 26.02.2025
Oxunuş sayı: 4848
