Nazirlik deputatın iddialarına cavab verdi: “...Yeni mexanizmlər hazırlanır”- SORĞU
Milli Məclisin Regional məsələlər komitəsinin üzvü Tahir Rzayev fevralın 10-da qurumun bugünkü iclasında müzakirəyə çıxarılan "Bələdiyyələrin fəaliyyətinə inzibati nəzarəti həyata keçirən orqanın illik məruzəsi"nin müzakirəsi zaman deyib ki, bəzi bələdiyyə üzvləri vəzifələrini yaxşı bilmədiklərindən qanunları pozurlar.
Onun sözlərinə görə, bələdiyyələrin 77 vəzifəli şəxsinin məsuliyyətə cəlb olunması ciddi məsələdir:
"Bələdiyyələri vətəndaşlar yaradır, amma onların keçirdiyi tədbirlərdə, gördüyü işlərdə iştirak etmirlər. Ümumiyyətlə, Azərbaycanda bələdiyyə-vətəndaş münasibətlərində çox böyük problemlər var. Vətəndaşlar bələdiyyələrə heç bir dəstək göstərmirlər, nə maddi, nə təşkilati".
T.Rzayev bildirib ki, bəzi bələdiyyə üzvləri qanunları, öz səlahiyyətlərini və vəzifələrini yaxşı bilmirlər:
"Nəticədə qanundan kənara çıxır, səlahiyyətlərini aşırlar. Amma məruzədə belə yaxşı bələdiyyələrin adları çəkilmir. Halbuki bu, stimul üçün yaxşı olardı”.
Parlamentarinin qaldırdığı məsələlər barədə Ədliyyə Naziriyi Crossmedia.az-ın sorğusuna cavab verib. Bildirilib ki, bələdiyyə üzvlərinin və qulluqçularının hüquqi biliklərinin və peşə bacarıqlarının artırılması məqsədilə Ədliyyə Nazirliyinin Bələdiyyələrlə iş baş idarəsi tərəfindən mütəmadi olaraq metodoloji iş aparılır, Ədliyyə Akademiyasının və regional ədliyyə idarələrinin iştirakı ilə seminarlar, təlim kursları təşkil olunur.
Həmçinin qeyd olunub ki, bələdiyyə idarəçiliyinin təkmilləşdirilməsi, onların fəaliyyətində hüquqpozmaları yaradan səbəb və şəraitin aradan qaldırılması, yerli özünüidarəetmədə aşkarlıq, şəffaflıq və hesabatlılığın gücləndirilməsi, həmçinin bələdiyyələrin fəaliyyətinə inzibati nəzarətin səmərəliliyinin artırılması istiqamətində davamlı işlər görülür: “Bu məqsədlə Ədliyyə Nazirliyi tərəfindən qanunvericiliyin təkmilləşdirilməsi ilə bağlı layihələr hazırlanaraq aidiyyəti üzrə təqdim olunur. Belə ki, “Bələdiyyələrin statusu haqqında” və “Bələdiyyələrin fəaliyyətinə inzibati nəzarət haqqında” Azərbaycan Respublikasının qanunlarında dəyişiklik edilməsi barədə” Azərbaycan Respublikasının 2024-cü il 18 oktyabr tarixli 49-VIIQD nömrəli Qanunu ilə bələdiyyələrin fəaliyyətinə nəzarət mexanizmləri təkmilləşdirilib. Həmin Qanunda bir çox dəyişikliklər nəzərdə tutulub. Onlardan biri də bələdiyyə aktlarının qəbul edildiyi tarixdən 3 iş günündən gec olmayaraq inzibati nəzarəti həyata keçirən orqanın informasiya sistemində yerləşdirilməsi ilə bağlı müddəadır. Əvvəllər qanunvericilikdə bələdiyyə aktlarının surətinin həmin aktların qəbul edildiyi andan 5 iş günündən gec olmayaraq inzibati nəzarəti həyata keçirən orqana göndərilməsi nəzərədə tutulurdu”.
Qeyd olunub ki, “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı”na dair Tədbirlər Planında tapşırıqlardan biri də bələdiyyə gəlir və xərclərinin vahid portalının yaradılması və bütün bələdiyyə xərclərinin portal vasitəsilə həyata keçirilməsi, portalın açıqlığının təmin olunması barədədir. Həmin tapşırığın icrası üçün qanunvericilik bazasının formalaşdırılması məqsədilə Nazirlik tərəfindən hazırlanmış “Büdcə sistemi haqqında”, “Bələdiyyələrin maliyyəsinin əsasları haqqında” və “Nağdsız hesablaşmalar haqqında” Azərbaycan Respublikasının qanunlarında dəyişiklik edilməsi barədə” Azərbaycan Respublikasının 2024-cü il 10 dekabr tarixli 86-VIIQD nömrəli Qanununun tətbiqi və bununla əlaqədar Azərbaycan Respublikası Prezidentinin bəzi fərmanlarında dəyişiklik edilməsi haqqında” Azərbaycan Respublikası Prezidentinin 15 yanvar 2025-ci il tarixli Fərmanı qəbul edilib. Hazırda portalın yaradılması istiqamətində müvafiq texniki işlər görülür. Qeyd edək ki, bələdiyyələrin qanunsuz fəaliyyətinin qarşısını almaq və nəzarəti gücləndirmək üçün müasir rəqəmsal texnologiyalardan istifadənin genişləndirilməsi, problemlərə rəqəmsal həllərin tətbiq edilməsi istiqamətində yeni mexanizmlər hazırlanır”.
Kənan Novruzov,
Ayhan Ağarzayev
13:11 11.02.2025
Oxunuş sayı: 9327
