Şair Ramaldanov: “Azərbaycan-Türkiyə hərbi əməkdaşlığı strateji tərəfdaşlıq ruhunda inkişaf edir”
Azərbaycan və Türkiyə arasında strateji hərbi əməkdaşlıq ildən-ilə daha da güclənir. Bu çərçivədə Azərbaycan Ordusunun şəxsi heyəti mütəmadi olaraq müxtəlif beynəlxalq hərbi təlimlərdə iştirak edərək döyüş hazırlığını artırır. Belə təlimlərdən biri də bu günlərdə başa çatan “Qış təlimi - 2025” oldu. Təlimdə əsas məqsəd soyuq qarlı havada hərbçilərin döyüş qabiliyyətinin və bacarıqlarının sınaqdan keçirilməsi və onların hazırlıq səviyyələrinin yüksəldilməsi olub.
Təlimlərin əhəmiyyəti barədə Crossmedia.az-a danışan ehtiyatda olan polkovnik, hərbi ekspert Şair Ramaldanov bildirib ki, Azərbaycan-Türkiyə münasibətləri bütün istiqamətlər üzrə inkişaf edir: "Ulu Öndər Heydər Əliyevin müəyyən etdiyi “bir millət, iki dövlət” prinsipi tam şəkildə inkişaf yolunu gedir. Münasibətlər inkişaf edir və müxtəlif istiqamətlərdə irəliləyir. Əlbəttə ki, münasibətlərdən danışanda hərbi əməkdaşlıqdan bəhs etməmək mümkün deyil. Çünki hərbi əlaqələr, bəlkə də, ən çox inkişaf etmiş əməkdaşlıq sahələrindən biridir. Azərbaycan və Türkiyə arasındakı hərbi əməkdaşlıq da bunun bariz nümunəsidir. Burada ortaq maraqlar mövcuddur. Bu mənada regionun təhlükəsizliyi ilə bağlı məsələlər və Azərbaycanın milli təhlükəsizliyinə təsir edə biləcək təhdidlərin qarşısının alınması xüsusi qeyd edilməlidir".
Ekspert söyləyib ki, Türkiyə hər zaman Azərbaycanın ərazi bütövlüyünü müdafiə edib və mənəvi dəstək nümayiş etdirib: "Türkiyə kənardan gələn beynəlxalq təhdidlərin qarşısını almaqda Azərbaycanın yanında olub. Azərbaycan ordusu Vətən müharibəsindən əvvəl də Türkiyə ordusu ilə sıx əməkdaşlıq edirdi və birgə təlimlər keçirilirdi. Vətən müharibəsindən sonra isə Şuşa Bəyannaməsi imzalandı. Bu sənəd Azərbaycan-Türkiyə münasibətlərinin strateji əsaslarını müəyyən edən mühüm hüquqi sənəddir. Bu bəyannamə çərçivəsində təhlükəsizlik və müdafiə sahəsində əməkdaşlıq dərinləşdirildi.
Bu kontekstdə Azərbaycan və Türkiyə birlikdə hansısa hərbi tapşırıqları yerinə yetirmək, təhlükəsizlik sahəsində birgə fəaliyyət göstərmək üçün əməkdaşlıqlarını daha da gücləndirirlər. İki ölkənin orduları nə qədər sıx əməkdaşlıq etsə, nə qədər birgə təlimlər keçirsə, onların döyüş hazırlığı və koordinasiyası o qədər güclənəcək. Bu, həm Şuşa Bəyannaməsində nəzərdə tutulan müddəalara, həm də hər iki ölkənin milli maraqlarına uyğundur. Ötən il 20-dən çox birgə hərbi təlim və tədbir keçirilib. Bu təlimlər qoşun növləri üzrə müxtəlif formatlarda təşkil olunub. Bəzi təlimlər konkret qoşun növlərinin iştirakı ilə keçirilsə də, bəzi təlimlərdə müxtəlif qoşun növləri birlikdə iştirak edib. Bu il isə daha çox belə təlimlərin keçirilməsi planlaşdırılır".
Polkovnikin sözlərinə görə, Türkiyə NATO-nun ən güclü ordularından birinə malikdir: "Xüsusilə quru qoşunları baxımından Türkiyə ordusu böyük təcrübəyə malikdir. Bu təcrübə və imkanlar Azərbaycan üçün də əhəmiyyətlidir. Azərbaycan ordusu Vətən müharibəsində qazandığı qələbə ilə öz hərbi peşəkarlığını və müasir döyüş taktikalarına uyğunlaşma qabiliyyətini nümayiş etdirdi. Vətən müharibəsi 21-ci əsrin müasir döyüş konsepsiyalarına uyğun aparılmış ilk müharibələrdən biri idi. Xüsusilə pilotsuz uçuş aparatlarının (PUA), o cümlədən "Bayraktar", yüksək dəqiqlikli silahların istifadəsi yeni döyüş strategiyasını formalaşdırdı. Bu yanaşma daha sonra Ukrayna-Rusiya müharibəsində də özünü göstərdi. Azərbaycan ordusunun tətbiq etdiyi yeni döyüş taktikaları beynəlxalq hərbi dairələrdə də diqqət mərkəzindədir. Azərbaycan hərbçiləri Türkiyə və digər ölkələrdə keçirilən beynəlxalq təlimlərdə fəal iştirak edir və onların təcrübəsi yüksək qiymətləndirilir".
Müsahibimiz qeyd etdi ki, birgə hərbi təlimlər hər iki ölkənin ordularının koordinasiyasını və döyüş qabiliyyətini artırır: "Azərbaycan və Türkiyə orduları eyni hədəflərə yönəlmiş əməliyyatları həyata keçirmək qabiliyyətini inkişaf etdirirlər. Təlimlər zamanı ümumi döyüş planlarının işlənməsi və qarşılıqlı fəaliyyətin koordinasiyası əsas məqsədlərdəndir.
Xüsusilə Türkiyədə keçirilən qış təlimləri mühüm əhəmiyyət kəsb edir. Bu təlimlər çətin hava və iqlim şəraitində döyüş hazırlığını təkmilləşdirmək məqsədi daşıyır. Azərbaycanın dağlıq və çətin relyefli bölgələri nəzərə alınaraq, belə təlimlərdə iştirak etmək ordumuz üçün mühüm təcrübə qazandırır. Bu baxımdan, Azərbaycan ordusunun qış təlimlərində iştirakı xüsusi əhəmiyyət daşıyır. Çünki ekstremal hava şəraitində döyüş tapşırıqlarının yerinə yetirilməsi əlavə hazırlıq və koordinasiya tələb edir. Bunun nəticəsində Azərbaycan və Türkiyə ordularının birgə fəaliyyət qabiliyyəti daha da artır.
Ümumilikdə, Azərbaycan-Türkiyə hərbi əməkdaşlığı strateji tərəfdaşlıq ruhunda inkişaf edir və bu, hər iki ölkənin təhlükəsizliyinin gücləndirilməsinə xidmət edir.”
Nərgiz Camalzadə
20:43 10.02.2025
Oxunuş sayı: 9736
