Dövlət sahibkarlara maliyyə dəstəyi göstərəcək - şərtlər nələrdir?
İşğaldan azad edilmiş ərazilərdə istehsal fəaliyyəti ilə məşğul olan sahibkarlara göstərilən maliyyə dəstəyi ilə bağlı qaydalarda dəyişiklik edilib. Nazirlər Kabinetinin yeni qərarı ilə elektrik enerjisi, təbii qaz, su təchizatı və tullantı sularının axıdılması xidmətlərindən istifadəyə görə verilən maliyyə yardımı üzrə növbəti il üçün tələb olunan vəsaitin əvvəlcədən büdcə layihəsində nəzərə alınması mexanizmi dəqiqləşdirilib. Belə ki, İqtisadiyyat Nazirliyi növbəti il üçün tələb olunan vəsaitlə bağlı məlumatı iyulun 1-dək Maliyyə Nazirliyinə təqdim etməlidir. Bu mexanizm işğaldan azad edilmiş ərazilərdə fəaliyyət göstərən biznes subyektlərinin kommunal xərclərinin maliyyə dəstəyi hesabına qismən kompensasiya olunmasına xidmət edir. Dəyişikliyin əsas istiqaməti yardımın özündən daha çox, onun maliyyələşdirilməsi və növbəti illər üzrə vəsaitin planlaşdırılması qaydasının təkmilləşdirilməsidir. Eyni zamanda, 2026-cı ildə sahibkarların maliyyələşmə imkanlarının artırılması üçün kredit faizlərinin subsidiyalaşdırılması və dövlət zəmanəti kimi digər mexanizmlər də tətbiq edilir. Yeni mexanizm çərçivəsində Bakı və Abşeron istisna olmaqla digər ərazilərdə verilən kreditlər üzrə faizlərin 50 faizi subsidiyalaşdırılır, kredit faizinin yuxarı həddi isə 13 faiz müəyyən edilib.
Mövzu ilə bağlı iqtisadçı ekspert Natiq Kərimli Crossmedia.az-a açıqlamasında bildirib ki, sahibkarlara maliyyə dəstəyinin konkret forması təfərrüatlar açıqlanandan sonra daha aydın görünə bilər:
“Çox güman ki, söhbət maliyyə yardımlarından gedirsə, burada kiçik və orta sahibkarlıq üçün faiz dərəcəsi aşağı olan, daha əlçatan və güzəştli kreditlər nəzərdə tutula bilər. Belə kreditlər sahibkarların xüsusilə ilkin mərhələdə maliyyə yükünü azaltmaqla yanaşı, onların avadanlıq almasına, istehsal imkanlarını genişləndirməsinə və dövriyyə vəsaiti formalaşdırmasına şərait yarada bilər. Və ya mikrosahibkarlara, ev şəraitində ailə biznesi qurmaq istəyənlərə birbaşa yardım göstərilməsi — avadanlıqların, mal-qaranın verilməsi və ya kiçik fermer təsərrüfatlarının yaradılmasına dəstək nəzərdə tutula bilər. Bu cür yardımlar xüsusilə öz biznesini qurmaq üçün kifayət qədər kapitalı olmayan şəxslər üçün daha əlçatan mexanizm ola bilər. Bundan başqa, sahibkarların əsas xərclərindən biri olan kommunal ödənişlərin müəyyən hissəsinin kompensasiya edilməsi də onların fəaliyyətinin davamlılığı baxımından əhəmiyyətlidir. Xüsusilə yeni yaradılan və hələ tam gücü ilə fəaliyyət göstərməyən müəssisələr üçün belə dəstək xərclərin azalmasına və sərbəst vəsaitin istehsalın inkişafına yönəldilməsinə imkan verə bilər. Yəqin ki, təfərrüatlar tam şəkildə açıqlanandan sonra mənzərə daha aydın görünəcək. Əsas məsələ maliyyə dəstəyinin sahibkar üçün real və əlçatan olması, onun əlavə maliyyə yükünü azaltması və nəticədə biznesin böyüməsinə, yeni iş yerlərinin yaradılmasına və istehsalın artmasına xidmət etməsidir”.
Zeynəb Həsən
17:45 06.10.2026
Oxunuş sayı: 53
