Nüvə enerjisi üzrə əməkdaşlıq genişlənir: Rumıniya Ukraynaya dəstəyə hazırdır
Rumıniya Ukraynaya nüvə enerji sahəsində texnologiya və təcrübə təqdim etməyə hazırdır.
Crossmedia.az xəbər verir ki, Rumıniya Prezidenti Nikuşor Dan bu barədə açıqlama verib.
Nikuşor Danın sözlərinə görə, Rumıniya nüvə energetikası sahəsində 50 illik təcrübəyə, zəruri istehsal bazasına və texnologiya və mühəndislik üzrə ixtisaslı mütəxəssislərə malikdir.
Rumıniya hazırda nüvə enerji inkişafını və istehsal gücünün artırılmasını da prioritet istiqamətlərdən biri kimi müəyyənləşdirib. Ölkədə Çernavoda Atom Elektrik Stansiyasının 1-ci enerji blokunun modernləşdirilməsi, həmçinin 3-cü və 4-cü reaktorların inşası ilə nüvə enerjisi istehsalının genişləndirilməsi nəzərdə tutulur.
Nikuşor Dan daha əvvəl də Ukraynanın dəstəklənməsi və iki ölkə arasında enerji və təhlükəsizlik sahələrində əməkdaşlığın genişləndirilməsinin vacibliyini vurğulayıb.
11:34 19.09.2026
Oxunuş sayı: 76
