Amerika
Vaşinqtonun Kiyev siyasəti dəyişir: Tramp Ukrayna ilə bağlı nə planlaşdırır?
ABŞ Prezidenti Donald Trampın Ukrayna müharibəsinin dayandırılması ilə bağlı siyasəti Vaşinqtonun Kiyevə münasibəti ətrafında müzakirələri yenidən gündəmə gətirib. Keçmiş ABŞ ordusunun Avropadakı komandanı Ben Hodces Tramp administrasiyasının Ukraynaya yanaşmasını tənqid edərək, Vaşinqtonun Kiyev üzərində təzyiq imkanlarının azaldığını bildirib.
Tramp isə son açıqlamalarında müharibənin başa çatdırılması üçün səylərin davam etdiyini bildirir. Sentyabrın 13-də o, Ukraynanı Rusiyanın yanacaq infrastrukturuna zərbələri dayandırmağa çağırıb. Bu mövqelər fonunda ABŞ administrasiyasının Ukrayna müharibəsində gələcək siyasəti və Vaşinqtonun Moskva ilə Kiyev arasındakı prosesə təsir imkanları yenidən diqqət mərkəzinə gəlir.
Crossmedia.az-a açıqlamasında politoloq Zeynal Əmrəliyev ABŞ-nin Ukrayna siyasətində Donald Tramp və Co Bayden administrasiyaları arasındakı yanaşma fərqlərinə toxunub:
“Bu müddətdə Ukraynaya lazımi səviyyədə dəstək verilmədiyinə dair çoxsaylı müzakirələr aparılırdı. Ukrayna tərəfindən, həm də ABŞ-nin özü tərəfindən mənfi fikirlər səsləndirilirdi ki, ABŞ lazımi dərəcədə Ukraynaya dəstək göstərmir. Çünki iddiaların özü kifayət qədər böyük ölçüdə idi. Açığını desək, Bayden administrasiyası dövründə dəstəyin lazımi səviyyədə Ukraynaya verilmədiyi ilə bağlı fikirlər var idi. Burada əsas məqsəd, əlbəttə ki, münaqişənin ABŞ tərəfindən Rusiyanı qıcıqlandırmayacaq şəkildə nizamlanması idi”, - deyə politoloq bildirib.
Zeynal Əmrəliyev Tramp administrasiyasının yanaşmasının əvvəlki dövrdən fərqləndiyini qeyd edib: “Bayden dövründə istəyirdilər ki, münaqişəni daha çox ABŞ-nin və Ukraynanın xeyrinə həll etsinlər. Ancaq Trampın dövründə vəziyyət fərqlidir. Tramp istəyir ki, bir ortaq məxrəcə gəlin sin və ümumi nəticə ilə münaqişənin həllinə nail olsunlar. Bu baxımdan, bəli, ABŞ-nin Ukraynaya dəstəyində müəyyən axsamalar var. Fikir ayrılıqları mövcuddur və bu fikir ayrılıqları da, əlbəttə ki, ümumi nəticəyə bir qədər mənfi təsir göstərir”.
Politoloq bildirib ki, Trampın prezident seçilməsi ərəfəsində ABŞ-nin Ukraynaya dəstəyinin dayandırıla biləcəyi ilə bağlı fikirlər səslənsə də, hazırkı mərhələdə dəstəyin müəyyən ölçüdə davam etdiyini qeyd etmək mümkündür.
“Donald Tramp seçilərkən ümumilikdə dəstəyin kəsiləcəyi və Ukraynanın çox çətin vəziyyətdə qalacağı barədə iddialar səsləndirilirdi. Çünki biz seçki kampaniyası dövründə Trampın bu səpkidə açıqlamalarının şahidi olmuşduq. Ancaq indiki mərhələdə görürük ki, müəyyən ölçüdə Tramp Ukraynaya dəstək nümayiş etdirir və Ukrayna da özündə böyük güc taparaq Rusiyaya qarşı real hərbi addımlar ata bilir. Bu xüsusda, bəli, ümumi tənqidlər ABŞ-ın Ukrayna siyasətinə, əlbəttə ki, təsir edə bilməz. Dəstək müəyyən ölçüdə davam edəcək, yəni lazımi səviyyədə. Sadəcə olaraq, Tramp Baydendən fərqli olaraq Rusiyanı qıcıqlandırmaq istəmir”, - deyə Zeynal Əmrəliyev vurğulayıb.
Nigar Xəlilli
20:18 18.09.2026
Oxunuş sayı: 52
