Almaniya Kansleri: Müsəlmanlar ölkəni tərk etməlidir
Almaniya kansleri Fridrix Merz Holokostla bağlı Almaniyanın tarixi məsuliyyətini qəbul etməyən müsəlman miqrantların ölkəni tərk etməli olduğunu bildirib.
Crossmedia.az xəbər verir ki, Merz bu fikirləri Berlində İsraildə dörd ildən bir keçirilən yəhudi idman tədbiri – “Makkabiada”da iştirak etmiş idmançıları qəbul edərkən səsləndirib.
Kansler çıxışında Almaniyanın Holokost qarşısındakı tarixi məsuliyyətinin yalnız ölkə vətəndaşlarına deyil, İslam ölkələrindən Almaniyaya gələn miqrantlara da aid olduğunu vurğulayıb.
“Ölkəmizin bu tarixi məsuliyyəti İslam ölkələrindən Almaniyaya gələnlər üçün də eyni şəkildə keçərlidir. Buna əməl etməyənlər ölkəmizi tərk etməlidirlər”, – deyə Merz bildirib.
O, çıxışında Almaniyanın keçmiş prezidenti Riçard fon Vaytszekkerin 1985-ci ildə Bundestaqda səsləndirdiyi fikirlərə də istinad edib. Həmin çıxışda keçmiş prezident gənclərin keçmişdə baş verənlərə görə məsuliyyət daşımadığını, lakin tarixin bundan sonra necə formalaşacağına görə məsuliyyət daşıdığını bildirmişdi.
Merz bu yanaşmanın bütün Almaniya cəmiyyətinə, o cümlədən ölkəyə gələn miqrantlara da şamil olunduğunu qeyd edib.
18:10 07.11.2026
Oxunuş sayı: 95
