FSB-dən Ukraynaya qarşı yeni ittiham: Britaniya səfirliyinə hücum planı hazırlanıb
Rusiyanın Federal Təhlükəsizlik Xidməti Moskvada Britaniya səfirinə və diplomatlarına qarşı terror hücumunun hazırlanması ilə bağlı SBU agenti olduğu iddia edilən şəxsin saxlanıldığını açıqlayıb.
Crossmedia.az xəbər verir ki, Rusiya Federal Təhlükəsizlik Xidməti bu barədə məlumat yayıb.
FSB-nin məlumatına görə, saxlanılan şəxs Rusiya vətəndaşıdır və Britaniyanın Moskvadakı səfirliyinin təhlükəsizlik xidmətində çalışıb. İddialara əsasən, o, səfirliyin təhlükəsizlik sistemi və diplomatların hərəkətləri barədə məlumatları Ukrayna tərəfinə ötürüb.
Rusiya xüsusi xidmətinin bildirdiyinə görə, toplanan məlumatların mümkün hücumların hazırlanmasında istifadə edilməsi planlaşdırılıb. FSB bu addımların məqsədinin Böyük Britaniyanı Rusiya ilə birbaşa qarşıdurmaya cəlb etmək və Kiyevin əlavə hərbi dəstək əldə etməsinə şərait yaratmaq olduğunu iddia edir.
Məlumata əsasən, saxlanılan şəxs məlumatları Ukraynalı bloqer Dmitri Karpenkonun göstərişi ilə toplayıb.
Britaniya səfirliyində çalışan şəxsin birbaşa Böyük Britaniya hökumətinin əməkdaşı deyil, xarici təhlükəsizlik şirkətinin əməkdaşı olduğu bildirilir. İddialar hazırda Rusiya tərəfinin açıqlamasına əsaslanır və müstəqil şəkildə təsdiqlənməyib.
Qeyd edək ki, Rusiya tərəfi daha əvvəl də Ukrayna xüsusi xidmətlərinin Moskvada terror aktları hazırladığını açıqlayıb. Məsələn, Rusiya Milli Antiterror Komitəsi iyul ayında Moskvada Ukrayna xüsusi xidmətlərinin tapşırığı ilə terror aktı hazırlamaqda şübhəli bilinən şəxsin saxlanıldığını açıqlamışdı.
12:19 10.09.2026
Oxunuş sayı: 51
