Xəzərdən yeni turizm marşrutları açılır: bu ölkələrə gəmiylə gedə bilərsiniz
Quru sərhədlərinin bağlı olması Azərbaycana səfər imkanlarını məhdudlaşdıran amillərdən biri olaraq qalır. Mövcud şəraitdə ölkəyə giriş əsasən hava nəqliyyatı vasitəsilə həyata keçirilir. Bununla yanaşı, Xəzər dənizinin turizm imkanlarından daha geniş istifadə məsələsi gündəmə gəlir. Xəzər hövzəsi Azərbaycanı bir sıra qonşu dövlətlərlə birləşdirən mühüm nəqliyyat və turizm məkanıdır. Qazaxıstan, Rusiya və İran istiqamətində dəniz turizminin inkişafı qarşılıqlı səfərlərin artmasına şərait yarada bilər. Su nəqliyyatının turizm məqsədilə aktivləşdirilməsi yeni marşrutların yaranmasına imkan verə bilər. Bu, həm turist axınının artmasına, həm də ölkələr arasında iqtisadi və humanitar əlaqələrin genişlənməsinə təsir göstərə bilər. Turizm ekspertləri hesab edirlər ki, gələcəkdə Xəzər üzərindən təşkil olunacaq səfərlər regionun turizm potensialına yeni imkanlar aça bilər.
Mövzu ilə bağlı Crossmedia.az-a açıqlama verən turizm eksperti Əziz Şiriyev bildirib ki, Xəzər dənizinin turizm potensialından istifadə qonşu ölkələrlə əlaqələrin genişlənməsinə mühüm töhfə verə bilər:
“Quru sərhədlərimiz bağlı olduğundan ölkəyə giriş yalnız hava yolu vasitəsilə mümkündür. Hazırda Xəzər dənizinin böyük turizm potensialı var və biz bir sıra qonşu ölkələrlə — xüsusilə Qazaxıstan, Rusiya və İranla bu sahədə yüksək səviyyədə əməkdaşlıq edə bilərik. Su yolunun aktivləşdirilməsi iki ölkə arasında turistlərin gediş-gəlişinə geniş şərait yaradacaq. Bu isə böyük imkanlar, iqtisadi inkişaf və ölkələrarası əlaqələrin daha da genişlənməsi deməkdir.
Hətta digər istiqamətləri də təklif edərdim. Həştərxan Rusiyadakı əsas liman şəhərlərindən biridir və Azərbaycandan oraya, eləcə də İrandakı Ənzəli limanına dəniz yolu ilə getmək mümkündür. Həştərxan vilayətinin burada nümayəndəliyi də fəaliyyət göstərir.
Düşünürəm ki, yaxın gələcəkdə dünyada sülh bərqərar olduqdan sonra gəmilər vasitəsilə bir sıra qonşu ölkələrə turistik səfərlər təşkil olunacaq. Bu addım həm qiymət baxımından əlverişli olacaq, həm də müxtəlif məkanlara səfər etmək üçün geniş imkanlar açacaq. Nəticədə həm regionun tanınmasına, həm də sosial-iqtisadi inkişafın artmasına müsbət təsir göstərəcək”.
Zeynəb Həsən
17:50 09.09.2026
Oxunuş sayı: 50
