Yaponiyada həyəcan siqnalı: yüksək səviyyəli xəbərdarlıq
Yaponiyanın Meteorologiya Agentliyi rekord həcmdə yağıntıdan sonra Kaqoşima prefekturasının Yakusima qəsəbəsində torpaq sürüşməsi ilə bağlı ən yüksək, 5-ci səviyyəli fövqəladə xəbərdarlıq elan edib.
Crossmedia.az xəbər verir ki, Yaponiyanın Meteorologiya Agentliyi bu barədə məlumat yayıb.
Yakusima qəsəbəsində yağıntının həcmi müşahidələr tarixində ən yüksək göstəriciyə çatıb. Agentlik ərazidə torpaq sürüşməsinin artıq baş vermiş ola biləcəyini bildirərək sakinləri maksimum ehtiyatlı olmağa çağırıb.
Məlumata görə, sentyabrın 4-də axşam saatlarında Yakusima ərazisində bir saat ərzində təxminən 120 millimetr güclü yağış qeydə alınıb. Daha sonra bölgədə yağışın intensivliyi artıb və 24 saatlıq yağıntı da rekord səviyyəyə yüksəlib.
Yaponiyanın xəbərdarlıq sistemində 5-ci səviyyə ən yüksək təhlükə dərəcəsidir. Bu səviyyə həyat üçün ciddi təhlükənin yarandığını və fövqəladə vəziyyətin artıq baş vermiş ola biləcəyini göstərir.
Meteoroloqlar torpaq sürüşməsi ilə yanaşı, alçaq ərazilərin su altında qalması, çaylarda suyun səviyyəsinin artması və daşqın təhlükəsinin də yüksək olduğunu bildiriblər.
Hadisəyə səbəb olan güclü yağışların regionda davam edəcəyi, buna görə təhlükənin yaxın saatlarda da yüksək olaraq qalacağı qeyd olunur.
10:35 05.09.2026
Oxunuş sayı: 45
