Azərbaycan- Gürcüatan münasibətlərində yeni mərhələ: Regionda yeni dövr başlayır
Azərbaycan-Gürcüstan münasibətlərində strateji tərəfdaşlığın möhkəmləndirilməsi istiqamətində növbəti görüş keçirilib. Gürcüstanın Baş naziri İrakli Kobaxidze Azərbaycanın bu ölkədəki səfiri Faiq Quliyevlə görüşündə ikitərəfli əlaqələrin yüksək səviyyəsi vurğulanıb və əməkdaşlığın daha da dərinləşdirilməsi imkanları müzakirə olunub.
Görüşdə Kobaxidzenin Azərbaycana rəsmi səfəri zamanı imzalanmış sənədlərin strateji əhəmiyyəti də xüsusi qeyd edilib. Azərbaycan və Gürcüstanın nəqliyyat, enerji və iqtisadiyyat kimi sahələrdə mövcud əməkdaşlığı nəzərə alınarsa, bu sənədlərin icrası iki ölkə arasındakı tərəfdaşlığın praktiki istiqamətlərinin genişlənməsinə təsir göstərə bilər.
Keçmiş xarici işlər naziri Elmar Məmmədyarov Crossmedia.az-a açıqlamasında Azərbaycan və Gürcüstan arasında strateji tərəfdaşlığın dərinləşdirilməsinin regional əməkdaşlıq və sabitlik baxımından əhəmiyyətindən danışıb.
O, iki ölkə arasında enerji, nəqliyyat və iqtisadi sahələrdə mövcud olan sıx əlaqələrin həm Azərbaycan, həm də Gürcüstan üçün mühüm faydalar yaratdığını bildirib:
"Artıq bu əməkdaşlıq öz təsirini göstərir. Azərbaycanla Gürcüstan arasında kifayət qədər sıx əlaqələr var. Bu, birbaşa Bakı-Tbilisi-Ceyhan neft kəmərindən başlayıb. Ondan sonra Bakı-Tbilisi-Qars dəmir yolu, Bakı-Tbilisi-Ərzurum qaz kəməri və digər layihələr həyata keçirilib.
Məncə, bu, çox əhəmiyyətli bir addımdır. Azərbaycan Gürcüstanla əlaqələri nə qədər sıxlaşdırsa, bu, həm Azərbaycan, həm də Gürcüstan üçün bir o qədər faydalı olacaq. Bu əməkdaşlıq həm siyasi, həm də iqtisadi baxımdan əhəmiyyətlidir".
Nigar Xəlilli
19:30 15.08.2026
Oxunuş sayı: 42
