Müharibəni uzadanlar cəzalanacaq — Ukraynadan Rusiyaya qarşı yeni sanksiya dalğası
Ukrayna diplomatiyasına konkret müddət qoyulub.
Crossmedia.az xarici mediaya istinadən xəbər verir.
Kiyev sentyabrın sonunadək Rusiyanın müharibə sənayesində iştirak edən şirkət və şəxslərə qarşı beynəlxalq sanksiyaların tətbiqinə nail olmağı hədəfləyir.
Ukrayna Prezidenti Volodimir Zelenski bildirib ki, xüsusilə Rusiya raketlərinin və pilotsuz uçuş aparatlarının istehsalında iştirak edən qurumlar və şəxslər qlobal məhdudiyyətlər siyahısına daxil edilməlidir.
“Əhəmiyyətli yurisdiksiyalarda Rusiyadan olan şirkətlər və fiziki şəxslər, eləcə də Rusiyaya kömək edən və müharibənin uzanmasına təsir göstərən şəxslər sanksiyalar altında olmalıdır. Bu, Ukrayna diplomatiyasının birbaşa vəzifəsidir”, – deyə Zelenski qeyd edib.
Prezident vurğulayıb ki, bu məsələni beynəlxalq liderlərlə bütün danışıqlarda şəxsən qaldıracaq.
Bundan əvvəl Kiyev Rusiya ilə əlaqəli müdafiə şirkətlərinə qarşı məhdudiyyətlərin genişləndirilməsinə başlayıb. Ukrayna hakimiyyəti hesab edir ki, texnologiya, maliyyə və komponentlərə çıxışın məhdudlaşdırılması Rusiyanın raket və dron istehsal imkanlarını zəiflədə bilər.
Ukrayna, həmçinin işğal olunmuş ərazilərdən qanunsuz taxıl ixracında iştirak edən şəxslərə və şirkətlərə qarşı yeni sanksiyalar tətbiq edib.
Sanksiya siyahısına 13 gəmi, 11 Rusiya vətəndaşı və 28 hüquqi şəxs daxil edilib. Məhdudiyyətlər taxıl daşınmasında iştirak edən gəmi sahibləri, kapitanlar və şirkətlərə də şamil olunub.
Ukrayna Prezidentinin sanksiya siyasəti üzrə nümayəndəsi Vladislav Vlasyuk bildirib ki, Kiyev bu məlumatları beynəlxalq tərəfdaşlarla paylaşacaq və digər ölkələrin də eyni addımları atmasını gözləyir.
Onun sözlərinə görə, işğal olunmuş ərazilərdən qanunsuz taxıl ixracında iştirak edən bütün tərəflər – şirkətlərdən tutmuş gəmilərə və kapitanlara qədər – məsuliyyət daşımalıdır.
23:27 14.08.2026
Oxunuş sayı: 46
