Ermənistan KTMT-dən çıxa bilər: Azərbaycan tələb edib?
Ermənistanın Kollektiv Təhlükəsizlik Müqaviləsi Təşkilatında (KTMT) səsinin məhdudlaşdırılması və ya alyansdan çıxması ölkəni yaxın perspektivdə alternativsiz təhlükəsizlik çətirindən məhrum edə bilər.
Crossmedia.az bu barədə“Sputnik Armenia”ya istinadən xəbər verir ki, bunu hərbi ekspert Vitali Mangasaryan bildirib.
Onun sözlərinə görə, Ermənistan hakimiyyəti cəmiyyətə və ekspert dairələrinə KTMT-də üzvlüyün dondurulmasının ölkənin maraqlarından və ümumi regional dəyişikliklər kontekstindən irəli gəlib-gəlmədiyi barədə məntiqli və inandırıcı izah verə bilmir.
Ekspert iddia edib ki, Ermənistanın KTMT-dən potensial çıxışında digər ölkələr, xüsusilə də Azərbaycan maraqlıdır. Onun sözlərinə görə, bu addım faktiki olaraq İrəvanın Bakıya növbəti güzəşti ola bilər.
Mangasaryan qeyd edib ki, istənilən hərbi ittifaq üzv ölkələrinə müəyyən təhlükəsizlik imkanları təqdim edir və bu, hətta təşkilata daxil olan dövlətlər arasında fikir ayrılıqları olduğu halda belə mümkündür. O, buna NATO daxilindəki nümunələri göstərib.
Ekspertin fikrincə, geosiyasi gərginliklər fonunda Ermənistanın KTMT üzvlüyünü qoruyub saxlaması ölkənin təhlükəsizlik potensialını artırır.
21:47 12.08.2026
Oxunuş sayı: 41
