Naxçıvanın yeni inkişaf xəritəsi
Naxçıvanın gələcək inkişafı artıq ayrı-ayrı layihələrin icrası ilə məhdudlaşmır. Muxtar respublikada nəqliyyat, sənaye, enerji, şəhər infrastrukturu və sosial xidmətləri əhatə edən kompleks layihələrin həyata keçirilməsi yeni inkişaf mərhələsinin əsas istiqamətlərini müəyyənləşdirir. Prezident İlham Əliyevin Naxçıvana səfəri çərçivəsində təqdim olunan layihələr də göstərir ki, qarşıdakı dövrdə əsas hədəf Naxçıvanın iqtisadi potensialını daha geniş regional imkanlarla birləşdirərək onun Azərbaycanın nəqliyyat və iqtisadi sistemindəki rolunu daha da gücləndirməkdir.
Mövzu ilə bağlı Crossmedia.az-a açıqlama verən Milli Məclisin Deputatı Rövşən Muradov qeyd edib ki, Naxçıvanın yeni inkişaf xəritəsi Prezident İlham Əliyevin Naxçıvana səfəri zamanı təqdim olunan layihələr muxtar respublikanın inkişafında yeni mərhələnin əsas konturlarını aydın göstərir: “Burada söhbət ayrı-ayrı obyektlərin istifadəyə verilməsindən və ya tikintisindən daha geniş prosesdən gedir: nəqliyyat bağlantıları, sənaye istehsalı, yaşıl enerji, müasir şəhər infrastrukturu və sosial xidmətlər vahid inkişaf sistemində birləşdirilir. Bu sistem Naxçıvanın mövcud potensialını daha geniş regional iqtisadi əlaqələrə çıxarmaq məqsədi daşıyır.
Bu baxımdan dəmir yolu layihələri xüsusi əhəmiyyət kəsb edir. Naxçıvan dəmir yolunun yenilənməsi, Ermənistan sərhədinə qədər tikinti işlərinin başlanması və gələcəkdə Türkiyənin Qars-İğdır-Dilucu xətti ilə uyğunlaşdırılması muxtar respublikanın regional nəqliyyat şəbəkəsində mövqeyini gücləndirəcək. Zəngəzur dəhlizi üzrə layihələrin tamamlanması ilə illik 15 milyon ton buraxılış qabiliyyətinin nəzərdə tutulması isə bu bağlantının iqtisadi miqyasını göstərir. 310 hektarlıq Naxçıvan Sənaye Parkı həmin imkanları istehsal və investisiyaya çevirmək üçün mühüm baza yaradacaq.
Eyni strateji məntiq enerji sahəsində də müşahidə olunur. Ümumi gücü 50 MVt olan “Şəms 1” və “Qərbi Üfüq” Günəş Elektrik stansiyalarının istifadəyə verilməsi ilə Naxçıvanın bərpaolunan enerji üzrə qoyuluş gücü 158 MVt-a çatacaq. Bununla yanaşı, 60 elektrik avtobusunun istifadəyə verilməsi, rəqəmsal nəqliyyat idarəetməsi və DOST Regional Mərkəzinin fəaliyyətə başlaması inkişafın sosial və şəhər həyatına birbaşa təsirini gücləndirir.
Məncə, bütün bu layihələri birləşdirən əsas məqam Naxçıvanın yeni iqtisadi funksiyasının formalaşdırılmasıdır. Dəmir yolu regionu bazarlara bağlayır, sənaye parkı bu bağlantını istehsala çevirir, yaşıl enerji dayanıqlı enerji bazası yaradır, müasir infrastruktur isə həmin inkişafı insanın gündəlik həyatında hiss olunan nəticəyə çevirir. Bu, Naxçıvanın Azərbaycanın regional iqtisadi və nəqliyyat sistemində çəkisini daha da artıracaq hərtərəfli inkişaf modelidir”.
Ayhan
16:14 12.08.2026
Oxunuş sayı: 43
