Təyyarə qəzası: Cavabsız suallar, müəmmalar və məsuliyyətsizlik
25 dekabrda baş vermiş təyyarə qəzası dünya mediasında geniş müzakirələrə səbəb oldu. Bu hadisə sadəcə bir faciə deyil, həm də Rusiya hökumətinin və onun əlaltısı olan Çeçenistan rəhbərliyinin məsuliyyətsizliyinin, özbaşınalığının bariz nümunəsidir.
Dörd fərqli ölkənin vətəndaşlarını daşıyan təyyarənin vurulması, onun hərbi obyekt kimi tanınması və eniş icazəsinin verilməməsi yalnız bir məqamı aydın göstərir: Rusiya və onun tabeliyində olan strukturlar beynəlxalq hüquqa, insan həyatına və diplomatik qaydalara hörmət etmir!
Rəsmi Moskvanın susqunluğu və laqeydliyi:
Hadisə baş verən andan Rusiya rəsmiləri hər hansı bir bəyanatla çıxış etməkdən çəkinmişdir. Putinin və onun administrasiyasının bu susqunluğu məsuliyyətdən qaçma cəhdindən başqa bir şey deyil. Necə ola bilər ki, ölkəsində belə bir hadisə baş versin, sən bu qədər laqeyd münasibət göstərirsən, onu gizlətməyə çalışırsan və təkəbbürlü çıxışlar edirsən? Rusiyanın bu davranışı bir daha sübut edir ki, insan həyatı onların siyasi maraqları qarşısında heç bir dəyər daşımır.
Azərbaycan və digər ölkələrdən olan zərərçəkənlərin ailələri təkcə həqiqəti deyil, həm də bu məsuliyyətsiz rejimin ədalət qarşısında cavab verməsini tələb edir. Rəsmi Moskva nə qədər məsuliyyətdən yayınmağa çalışsa da, bu cür cinayətlər əbədi olaraq unudulmayacaq!
Ramzan Kadırov: Özbaşınalığın simvolu:
Hadisədə məsuliyyət daşıyanlardan biri də Çeçenistan rəhbəri Ramzan Kadırovdur. Qəzanın baş verdiyi bölgənin rəhbəri kimi Kadırovun özünə gəlməsi və üzrxahlıq etməsi gözlənilirdi. Lakin o, üzr istəmək əvəzinə zərərçəkənlərə pul yardımı təklif etməklə məsələni "həll etmək" niyyətindədir. Bu, nə dərəcədə vicdansız bir davranışdır! İnsan həyatının dəyərini pulla ölçmək Kadırovun siyasi və insani dəyərlərdən nə qədər uzaq olduğunu bir daha sübut edir.
Ramzan Kadırov üçün bu qədərmi çətindir səhvi qəbul edib üzr istəmək? Bu zərərçəkənlərə "pul təklif etməklə" onların həyatını qaytara biləcəyini düşünürlər? Bu yalnız rəhbərliyin acizliyini və məsuliyyətsizliyini nümayiş etdirir!
Rusiya və Çeçenistan rəhbərliyi məsuliyyəti bölüşməlidir!
Bu faciənin günahkarları yalnız texniki səhv edənlər deyil, həm də onlara göstəriş verənlərdir. Onların məsuliyyətsiz qərarları və hərəkətsizlikləri nəticəsində onlarca insan həyatını itirib. Rusiya hökumətinin nümayəndələri və Çeçenistan rəhbərliyi yalnız üzr istəməklə kifayətlənməməli, həm də məsuliyyətə cəlb olunmalıdır.
Azərbaycan xalqı bu məsələni unuda və bağışlaya bilməz. Məsuliyyətsizliyə qarşı mübarizə aparmaq üçün beynəlxalq ictimaiyyət Rusiyaya və onun əlaltısı olan rejimlərə qarşı tədbirlər görməlidir. İnsan həyatına belə münasibət yolverilməzdir!
Hadisə ilə bağlı Türkiyə, Azərbaycan, Braziliya və Qazaxıstan ekspertləri tərəfindən aparılan araşdırma ədalətin bərpasına ümid verir. Ancaq bu iş təkcə araşdırma ilə bitməməli, məsuliyyət daşıyan şəxslərin ən ağır cəzalar alması ilə nəticələnməlidir.
Ayhan Ağarzayev
08:26 27.12.2024
Oxunuş sayı: 14529
