Proses başlayıb: Əvvəlcə Zəngəzuer dəhlizi açılır, sonra isə...
TRIPP layihəsi Cənubi Qafqazda nəqliyyat bağlantılarının inkişafı və iqtisadi əməkdaşlığın genişləndirilməsi baxımından mühüm təşəbbüslərdən biri kimi gündəmə gəlib. Layihənin regionda təhlükəsizlik və davamlı sülhə töhfə verməsi də diqqət çəkən əsas məqamlardandır.
Azərbaycan Prezidenti İlham Əliyev ABŞ Prezidenti Donald Trampa ünvanladığı məktubda TRIPP layihəsinin çoxtərəfli iqtisadi əməkdaşlıq, nəqliyyat bağlantıları və təhlükəsizliyin təminatı baxımından böyük əhəmiyyət daşıdığını bildirib. Prezident həmçinin Azərbaycan və Ermənistan arasında paraflanan sülh sazişini və ATƏT-in Minsk qrupunun ləğvi ilə bağlı razılaşmaları regionda davamlı sülh üçün mühüm addımlar kimi qiymətləndirib.
Milli Məclisin deputatı Fariz İsmayılzadə Crossmedia.az-a açıqlamasında bildirib ki, TRIPP layihəsi regionun geosiyasi və nəqliyyat xəritəsində mühüm dəyişikliklərə səbəb ola bilər:
“Doğrudan da, TRIPP layihəsi regionun bütün geosiyasi balansını dəyişən bir layihədir, eyni zamanda yeni nəqliyyat dəhlizlərini açan bir layihədir. Mən buna Bakı-Tbilisi-Ceyhan layihəsi kimi baxıram. Çünki, həqiqətən, yeni imkanlar açır, yeni regional inteqrasiyaya dəstək olur”.
Deputat layihənin reallaşdırılması qarşısında müəyyən çətinliklərin olduğunu da diqqətə çatdırıb:
“Təbii ki, layihənin çətinlikləri də var. Bəzi ölkələr buna qarşı çıxış edir və xüsusilə layihənin infrastrukturunun qurulması vəsait tələb edir və eyni zamanda təhlükəsizlik sistemləri də yerində olmalıdır. Amma müsbət cəhəti odur ki, Amerika hökuməti buna böyük bir dəstək verir – həm siyasi, həm logistika, həm maliyyə dəstəyi”.
F.İsmayılzadə TRIPP layihəsinin Azərbaycanın nəqliyyat imkanlarını genişləndirəcəyinə və ölkənin Avropa ilə Asiyanı birləşdirən mühüm marşrut kimi mövqeyini gücləndirəcəyinə ümid etdiyini bildirib:
“Ümid edirik ki, Trampın hakimiyyəti dövründə TRIPP layihəsi reallaşacaq və Zəngəzur dəhlizinin bünövrəsi olacaq. Ardınca Azərbaycan həm Türkiyə ilə, həm qonşu ölkələrlə yeni nəqliyyat dəhlizləri əldə edəcək. Və beləliklə, biz bir daha azərbaycanlı olaraq özümüzü dünyada çox etibarlı və stabil bir Orta Dəhliz yolu kimi göstərmiş oluruq. Avrasiya məkanında Avropanı, Asiyanı birləşdirən bir etibarlı nəqliyyat dəhlizi kimi göstərmiş olacağıq”.
Nigar Xəlilli
12:45 10.08.2026
Oxunuş sayı: 43
