Rasim Musabəyov: “Rusiya məsuliyyət daşımalıdır”
Azərbaycan Milli Məclisinin Beynəlxalq münasibətlər komitəsinin üzvü Rasim Musabəyov Turan agentliyinə açıqlamasında Embraer təyyarəsinin düşməsi ilə bağlı məsuliyyətin Rusiyanın üzərinə düşdüyünü bildirib. Onun sözlərinə görə, təyyarə Qroznı üzərində, Rusiyanın hava hücumundan müdafiə sistemi (PVO) tərəfindən vurulub və hazırda Rusiya tərəfi bu məsələni ört-basdır etməyə çalışır:
“Bu hadisəni törədənlər məsuliyyətə cəlb edilməli, həlak olanların ailələrinə və yaralananlara kompensasiya ödənilməlidir. Əks halda, iki ölkə arasındakı münasibətlər tamamilə başqa bir müstəviyə keçə bilər.”
Musabəyov, həmçinin, 2020-ci ildə Qarabağ müharibəsi zamanı Azərbaycan ordusunun səhvən Rusiyanın hərbi helikopterini vurduğunu xatırladıb. Həmin vaxt Bakı üzrxahlıq etmiş və kompensasiya ödəmişdi:
“Bu, mədəni münasibətlərin göstəricisidir. Əgər hava hücumundan müdafiə sistemi işləyirsə, hava limanı bağlanmalı, təhlükə ilə bağlı xəbərdarlıq edilməliydi ki, heç kim ora uçmasın. Günahkarlar mütləq məsuliyyətə cəlb olunmalıdır.”
Musabəyov Rusiya tərəfini bu məsələdə adekvat addımlar atmağa və üzr istəməyə çağırıb.
Gültac Mehdizadə
08:31 27.12.2024
Oxunuş sayı: 8641
