Meşə yanğınlarının qarşısını necə almaq olar?- Dünya bu xəbəri gözləyirdi
Kanadanın qərbində davam edən meşə yanğınları geniş əraziləri əhatə edərək yaşayış məntəqələrinə ciddi ziyan vurub. Güclü küləyin təsiri ilə sürətlə yayılan alov minlərlə insanın təxliyəsinə, yüzlərlə evin yanmasına və fövqəladə vəziyyət tədbirlərinin genişləndirilməsinə səbəb olub. Rəsmilər yanğınların bir hissəsinin hələ də nəzarət altına alınmadığını bildirirlər.
Ekoloq Cavid Hüseynov Crossmedia.az-a açıqlamasında bildirib ki, Kanadanın qərbində baş verən genişmiqyaslı meşə yanğınları son illərin ən ciddi ekoloji fəlakətlərindən biridir. Onun sözlərinə görə, yanğınların bu qədər sürətlə yayılmasına həm təbii, həm də insan amili təsir göstərir.
Ekspert qeyd edib ki, isti və quraq hava şəraiti, güclü külək, quru şimşəklər və iqlim dəyişikliyi yanğınların əsas səbəbləri sırasındadır:
"Quru və anomal isti hava meşə örtüyündəki rütubəti sürətlə azaldır. Nəticədə ağaclar, kollar və torpaq qatı ən kiçik qığılcımdan belə alovlanır. Güclü külək isə alovu kilometrlərlə uzağa daşıyaraq yeni yanğın ocaqları yaradır. Bundan əlavə, quru şimşəklər və insan ehtiyatsızlığı da yanğınların başlanmasına səbəb olur”.
Həmsöhbətimizin fikrincə, iqlim dəyişikliyi bu cür hadisələrin miqyasını və intensivliyini daha da artırır:
"Qışda qarın az yağması, yaz və yay aylarında yağıntının normadan aşağı olması bitki örtüyünü qurudur və yanğın riskini yüksəldir. Xüsusilə Arktika və Kanadanın şimalında temperaturun daha sürətlə artması quraqlığı gücləndirərək yanğın mövsümünü uzadır".
Ekoloq torflu torpaqlarda baş verən yanğınların daha təhlükəli olduğunu da vurğulayıb:
"Quruyan torf qatları çox asan alışır və yanğın torpağın dərin qatlarında aylarla, hətta qış boyu davam edə bilir. Yaz aylarında isə bu gizli ocaqlar yenidən səthə çıxaraq yeni meşə yanğınlarına səbəb olur".
C.Hüseynov hesab edir ki, bu cür fəlakətlərin qarşısını almaq üçün qabaqlayıcı tədbirlərin görülməsi vacibdir:
"Meşələrdə quru ağac və bitki qalıqlarının təmizlənməsi, nəzarətli profilaktik yanğınların həyata keçirilməsi, peyk monitorinq sistemlərinin tətbiqi, yaşayış məntəqələri ətrafında bufer zonalarının yaradılması və təxliyə planlarının hazırlanması gələcəkdə bu cür fəlakətlərin təsirini minimuma endirə bilər".
Nigar Xəlilli
11:30 07.08.2026
Oxunuş sayı: 56
