Çində əcnəbilərin şəxsi məlumatları açıq platformada aşkarlanıb
Kibertəhlükəsizlik üzrə tədqiqatçı və jurnalist Mark Hofer Çində yaşayan və ya ölkəyə səfər edən minlərlə əcnəbinin şəxsi məlumatlarını ehtiva edən ictimaiyyətə açıq polis platformasını aşkar edib. Məlumata görə, sistem əcnəbilərin hərəkətlərini və şəxsi məlumatlarını geniş şəkildə izləyib.
Crossmedia.az xəbər verir ki, "The New York Times" bu barədə məlumat yayıb.
Nəşrin yazdığına görə, Mark Hofer 2026-cı ilin əvvəlində şəbəkə monitorinqi apararkən təsadüfən "Xarici Personal üçün Dinamik Monitorinq Platforması" adlı sistemə çıxış əldə edib. Platforma 2022-ci il Qış Olimpiya Oyunlarının keçirildiyi şəhərlərdən biri olan Çjanczyakouya aid olub və burada təxminən 12 min nəfərin məlumatı saxlanılıb. Onların arasında əcnəbilər, jurnalistlər, Honkonq və Tayvan sakinləri, həmçinin hakimiyyət orqanlarının risk qrupuna daxil etdiyi şəxslər də yer alıb.
Hofer verilənlər bazasında öz profilini də aşkar etdiyini bildirib. Burada onun Çin immiqrasiya xidmətinin çəkdiyi fotoşəkil, pasport nömrəsi və mobil telefon nömrəsi yerləşdirilib.
Araşdırmaya görə, platformada yalnız miqrasiya məlumatları deyil, həm də pasport məlumatları, yaşayış ünvanları, ailə vəziyyəti, iş yeri, təyyarə və qatar səfərləri, xəstəxanaya müraciətlər, yanacaq ödənişləri, müşahidə kameraları və üz tanıma sistemləri vasitəsilə qeydə alınan hərəkətlər barədə məlumatlar da toplanıb.
Məqalədə Monqolustan vətəndaşı ilə bağlı nümunə də göstərilib. Bildirilir ki, sistem onun yaşayış kompleksindən ticarət mərkəzlərinə, restoranlara və supermarketlərə qədər hərəkətlərini izləyib. Bəzi məlumatlar üz tanıma texnologiyası vasitəsilə qeydə alınıb.
"The New York Times" platforma ilə Pekində yerləşən və polis üçün müşahidə sistemləri hazırlayan Origin Dynamic şirkəti arasında əlaqə olduğunu qeyd edib. Bildirilib ki, şirkət 2023-cü ildə əcnəbilərin məlumatlarının idarə olunması üçün oxşar sistem üzrə patent müraciəti edib. Lakin nə şirkət, nə də Çjanczyakou İctimai Təhlükəsizlik Bürosu qəzetin sorğularını cavablandırıb.
Jurnalistlərin qənaətinə görə, bu sistem Çin hakimiyyətinin müşahidə kameraları, tibbi qeydlər, dövlət reyestrləri və digər mənbələrdən əldə olunan məlumatları bir platformada birləşdirərək əcnəbilər üzərində genişmiqyaslı rəqəmsal nəzarət həyata keçirdiyini göstərir.
Kanadalı kibertəhlükəsizlik mütəxəssisi Qreq Uolton isə bildirib ki, platformanın kifayət qədər qorunmaması Çində rəqəmsal nəzarət infrastrukturunun sürətlə genişlənməsinin nəticəsidir. Onun sözlərinə görə, hər yeni sistem həssas şəxsi məlumatların yanlış konfiqurasiya olunması, kopyalanması və ya kənar şəxslər üçün əlçatan qalması riskini artırır.
12:10 03.08.2026
Oxunuş sayı: 53
