Azərbaycan gələcəkdə də nüfuzlu idman yarışlarına ev sahibliyi edəcək- RƏY
Bakının növbəti dəfə beynəlxalq güləş yarışına uğurla ev sahibliyi etməsi Azərbaycanın idman ölkəsi kimi nüfuzunu daha da möhkəmləndirir. Dünya Güləş Birliyi rəhbərinin səfəri və səsləndirdiyi fikirlər ölkədə güləşin inkişafına verilən dəstəyin beynəlxalq səviyyədə də yüksək qiymətləndirildiyini göstərir.
Report İnformasiya Agentliyinin idman şöbəsinin rəhbəri Kənan Həsənov Crossmedia.az-a açıqlamasında bildirib ki, beynəlxalq səviyyəli idman yarışlarının Azərbaycanda keçirilməsi ölkədə həmin idman növlərinin inkişafına və kütləviliyinin artmasına mühüm töhfə verir:
"İstənilən idman növü üzrə nüfuzlu beynəlxalq yarışların Azərbaycanda təşkili həmin idman növünə marağı artırır və onun inkişafını sürətləndirir. Güləş də bu baxımdan istisna deyil. Güləş Azərbaycanın milli idman növüdür və ölkəmizə beynəlxalq arenada ən çox medal qazandıran idman növü kimi xüsusi yer tutur. Həm nəticələr, həm də kütləvilik baxımından güləş Azərbaycanda aparıcı idman növlərindən biridir".
O, qeyd edib ki, beynəlxalq güləş qurumlarının Azərbaycana etimad göstərməsi ölkənin bu sahədə qazandığı uğurların məntiqi nəticəsidir:
"Azərbaycan dünya güləşində özünəməxsus mövqeyə malikdir. Beynəlxalq federasiyaların ölkəmizə etimad göstərməsi təsadüfi deyil. Bu etimad həm Azərbaycan güləşçilərinin uğurlu nəticələri, həm də ölkənin idman sahəsində qazandığı nüfuzla bağlıdır".
K.Həsənov vurğulayıb ki, Azərbaycan beynəlxalq yarışların yüksək səviyyədə təşkili ilə də seçilir:
"Təkcə güləş deyil, müxtəlif idman növləri üzrə keçirilən nüfuzlu beynəlxalq yarışların təşkilatçılığı baxımından Azərbaycan uzun illərdir nümunə göstərilir. Beynəlxalq federasiyaların rəhbərləri, nümayəndə heyətləri və iştirakçılar ölkəmizdə yarışların yüksək səviyyədə təşkil olunduğunu dəfələrlə qeyd ediblər. İllər ərzində keçirilən turnirlər zamanı ciddi insident və ya təşkilati problemlərin yaşanmaması da bunun göstəricisidir".
Ekspert əlavə edib ki, Bakıda keçirilən U-17 dünya çempionatı gələcək güləşçi nəslinin formalaşmasına da müsbət təsir göstərəcək:
"Bu yarışda iştirak edən Azərbaycan güləşçiləri gələcəyin Olimpiya ümidləri hesab olunur. Onların uğurlu çıxışı daha kiçik yaş qruplarında məşğul olan idmançılar üçün də motivasiya rolunu oynayır və milli komandaya düşmək istəyini daha da artırır".
K.Həsənov bildirib ki, Azərbaycanın beynəlxalq idman arenasında formalaşdırdığı müsbət imic gələcəkdə də nüfuzlu yarışların ölkəmizdə keçirilməsinə imkan yaradacaq:
"Azərbaycan artıq dünyada idman ölkəsi kimi tanınır. Qarşıdakı illərdə daha nüfuzlu və daha genişmiqyaslı yarışların da ölkəmizdə keçiriləcəyinə inanırıq. Bu, həm idmançılarımızın uğurları, həm də Azərbaycanın yüksək təşkilatçılıq bacarığının nəticəsidir".
Ekspert sonda qeyd edib ki, əldə olunan uğurlar dövlətin idmana göstərdiyi sistemli dəstəyin nəticəsidir:
"Azərbaycanda müasir idman infrastrukturu formalaşdırılıb, bölgələrdə də beynəlxalq yarışlar keçirilir. Dünya çempionatına ev sahibliyi edən Milli Gimnastika Arenası bunun ən bariz nümunələrindən biridir. Bütün bunlar ölkədə idmanın inkişafına yönəlmiş dövlət siyasətinin və idmana göstərilən diqqətin məntiqi nəticəsidir".
Nigar Xəlilli
12:35 31.07.2026
Oxunuş sayı: 57
