Həftəsonu məktəblərinin müəllimləri üçün təlim keçirilib
Azərbaycan Respublikasının Diasporla İş üzrə Dövlət Komitəsinin dəstəyi ilə həyata keçirilən “Milli Dilli” onlayn dərs layihəsi çərçivəsində xaricdə fəaliyyət göstərən həftəsonu Azərbaycan məktəblərinin müəllimləri üçün təlim təşkil olunub.
Crossmedia.az xəbər verir ki, Zoom platformasında keçirilən təlimdə Azərbaycan dilinin tədrisində müasir və innovativ yanaşmalar, tədris prosesinin səmərəliliyinin artırılması, müəllimlərin peşəkar inkişafı və metodiki təminat məsələləri müzakirə edilib. İştirakçıların sualları cavablandırılıb və xaricdə yaşayan azərbaycanlı uşaqlara ana dilinin öyrədilməsi istiqamətində görülən işlər barədə məlumat verilib.
Qeyd olunub ki, “Milli Dilli” layihəsi xaricdə yaşayan gənc soydaşların Azərbaycan dilini, tarixini və milli-mədəni dəyərlərini öyrənməsinə dəstək göstərməklə yanaşı, həftəsonu məktəblərində tədrisin keyfiyyətinin yüksəldilməsinə xidmət edir.
16:59 29.07.2026
Oxunuş sayı: 274
