ABŞ-Çin qarşıdurması yeni mərhələdə: Ağlımıza gəlməyən başımıza gəlir
ABŞ administrasiyası süni intellekt sahəsində rəqabəti daha sərt mərhələyə keçirməyə hazırlaşır. Vaşinqton Çin şirkətlərinin intellektual mülkiyyət oğurluğunda "distillasiya" metodundan istifadə etməsi halında onlara qarşı sanksiyalar tətbiq edilə biləcəyini açıqlayıb.
Beynəlxalq münasibətlər üzrə ekspert Əziz Əlibəyli Crossmedia.az-a açıqlamasında bildirib ki, ABŞ ilə Çin arasında rəqabətin əsas istiqamətlərindən biri artıq süni intellekt sahəsidir:
"Çin və ABŞ arasında yeni rəqabət müstəvisi məhz süni intellekt sahəsində formalaşır. Hazırda iki ölkə arasındakı əsas mübarizə texnoloji üstünlüyün əldə olunması üzərində qurulub".
Ekspertin sözlərinə görə, son illərdə süni intellekt texnologiyalarının inkişafı baxımından Çin mühüm irəliləyiş əldə edib:
"Son informasiya texnologiyalarının inkişafı fonunda Çinin müəyyən istiqamətlər üzrə ABŞ-i üstələdiyi görünür. Bununla belə, internet texnologiyalarının formalaşması və qlobal miqyasda istifadə olunan bir çox proqram təminatı, innovasiya və ixtiraların müəllifi kimi ABŞ-in lider mövqeyini qısa müddətdə sarsıtmaq asan olmayacaq".
Ə.Əlibəyli hesab edir ki, süni intellekt sahəsində rəqabət gələcəkdə daha da kəskin xarakter alacaq:
"Süni intellekt uğrunda rəqabət yaxın illərdə daha geniş miqyas alacaq və ənənəvi texnoloji mübarizənin sərhədlərini aşacaq. Bu texnologiyalar həm iqtisadi, həm də hərbi sahədə dövlətlərin imkanlarını müəyyən edən əsas amillərdən birinə çevriləcək".
Politoloq bildirib ki, müasir münaqişələrdə süni intellektin rolu artıq açıq şəkildə hiss olunur:
"Artıq müxtəlif regional münaqişələrdə süni intellekt imkanlarından istifadə olunduğunu müşahidə edirik. Bu texnologiyalar kəşfiyyat məlumatlarının emalı, hərbi qərarların qəbulu və əməliyyatların idarə olunmasında mühüm rol oynayır".
Ə.Əlibəylinin fikrincə, texnoloji üstünlük bundan sonra qlobal güclər arasında rəqabətin əsas meyarlarından biri olacaq:
"Kim süni intellekt sahəsində daha böyük üstünlük əldə edəcəksə, gələcəyin iqtisadi, hərbi və geosiyasi balansına da daha ciddi təsir göstərmək imkanına sahib olacaq. Buna görə də ABŞ ilə Çin arasındakı rəqabətin əsas ağırlıq mərkəzi məhz bu sahədə cəmləşəcək".
Nigar Xəlilli
19:00 24.07.2026
Oxunuş sayı: 50
