Zelenski: Rusiyanın cənubundakı hərbi-logistika obyektlərinə zərbələr endirilib
Ukrayna Prezidenti Volodimir Zelenski ölkəsinin uzaqmənzilli silahlarla Rusiyanın Krasnodar və Stavropol diyarlarında yerləşən bir sıra hədəfləri vurduğunu açıqlayıb.
Crossmedia.az xəbər verir ki, bu barədə “RIA Novosti” məlumat yayıb.
Zelenskinin sözlərinə görə, zərbələr Rusiya ordusunun pilotsuz uçuş aparatları üçün ehtiyat hissələri, naviqasiya avadanlığı və digər hərbi təchizatla təmin olunmasında istifadə edildiyi iddia olunan logistika mərkəzlərinə endirilib. O, həmçinin daha bir neft bazasının vurulduğunu bildirib.
Ukrayna lideri əlavə edib ki, Qara və Azov dənizlərində Rusiyanın “kölgə donanması”na aid olduğunu iddia etdiyi bir tanker və dörd yük gəmisi də zərbələrə məruz qalıb.
“Biz tamamilə haqlı olaraq müharibəni Rusiyanın öz ərazisinə qaytarırıq. Sülh lazımdır və Ukrayna Rusiya tərəfinə bütün təkliflərini təqdim edib. Onları diplomatiyaya keçməyə məcbur etmək lazımdır”, – deyə Zelenski özünün Telegram kanalında yazıb.
14:51 22.07.2026
Oxunuş sayı: 54
