Hava limanında növbəni qısaldan sadə üsul açıqlanıb
Turistlər hava limanında təhlükəsizlik yoxlamasından daha tez keçmək üçün sadə bir seçim edərək növbədə gözləmə müddətini azalda bilərlər.
Crossmedia.az xəbər verir ki, "Manchester Airport" bu barədə məlumat yayıb.
"Manchester Airport"un rəsmi saytında dərc olunan "Tam Hava Limanı Bələdçisi"ndə sərnişinlərə təhlükəsizlik yoxlaması zamanı mümkün olduqda sol zolağı seçmək tövsiyə edilir.
Hava limanının izahına görə, insanların əksəriyyəti sağ əlli olduğundan şüuraltı şəkildə sağ tərəfdəki zolağa üstünlük verir. Bu səbəbdən sol zolaqda adətən daha az sıxlıq müşahidə olunur və yoxlamadan keçmək daha sürətli olur.
Bununla yanaşı, sərnişinlər əlavə ödəniş qarşılığında FastTrack xidmətindən də yararlana bilərlər. Xidmət prioritet zolaqdan istifadə etməyə imkan verir və təhlükəsizlik yoxlaması, eləcə də bəzi hallarda pasport nəzarətində gözləmə müddətini azaltmağa kömək edir.
Oxşar tövsiyə "London Stansted Airport" tərəfindən də verilib. Hava limanı sərnişinlərə imkan olduqda təhlükəsizlik yoxlaması üçün sol zolağı seçməyi məsləhət görür. Bildirilir ki, bu üsul xüsusilə yay tətili və digər gərgin səyahət dövrlərində faydalı ola bilər.
"London Stansted Airport" həmçinin təhlükəsizlik yoxlamasını sürətləndirmək üçün asan geyinilib-çıxarılan ayaqqabı seçməyi, mürəkkəb kəmər və bərkidicilərdən, həddindən artıq zinət əşyalarından istifadə etməməyi, cibdə isə lazımsız əşyalar saxlamamağı tövsiyə edir.
Bundan əlavə, hava limanı temperatur fərqlərini nəzərə alaraq qat-qat geyinməyi məsləhət görür. Bildirilir ki, lazım gəldikdə çıxarıla bilən sviter və ya digər üst geyimi həm rahatlıq, həm də uçuş zamanı yastıq kimi istifadə etmək mümkündür.
Mütəxəssislər turistlərə səyahət zamanı baqajdan daha səmərəli istifadə etməyi də tövsiyə edirlər. Onların sözlərinə görə, KonMari qatlama üsulu geyimləri daha yığcam yerləşdirməyə və çamadandakı boş sahədən maksimum istifadə etməyə imkan verir.
00:52 15.07.2026
Oxunuş sayı: 47
