Fransanı güclü istilər bürüdü: Sakinlər təxliyə edilir
Fransada davam edən ekstremal isti hava şəraiti ilə əlaqədar 61 departamentdə narıncı təhlükə səviyyəsi elan olunub.
Crossmedia.az xəbər verir ki, bu barədə Le Monde nəşri məlumat yayıb.
Fransanın Milli Meteorologiya Xidmətinin məlumatına görə, çərşənbə axşamı ölkənin bir çox bölgəsində havanın temperaturu 36–40 dərəcə, bəzi ərazilərdə isə 41 dərəcəyədək yüksələcək.
Anomal istilər fonunda meşə yanğınları riski də kəskin artıb. Məlumata görə, 61 departament yüksək, Esson, Dö-Sevr və Voklyuz departamentləri isə çox yüksək yanğın riski zonası elan edilib.
Ölkənin cənubunda genişmiqyaslı meşə yanğınları davam edir. Ero regionunda polis qəsdən yanğın törətməkdə şübhəli bilinən iki nəfəri saxlayıb. Aspre dağ massivində alov təxminən 4 900 hektar ərazini əhatə edib.
Fransanın daxili işlər naziri Loran Nunes bildirib ki, yanğın qismən lokallaşdırılsa da, hələ tam nəzarət altına alınmayıb. Hadisə nəticəsində 11 nəfər, o cümlədən 7 yanğınsöndürən xəsarət alıb.
Yanğınlar səbəbindən iyirmiyə yaxın yaşayış məntəqəsinin sakinləri təxliyə olunub və onların çərşənbə axşamından əvvəl evlərinə qayıtması mümkün olmayacaq.
Drom departamentində isə dağlıq ərazidə baş verən yanğın artıq 1 000 hektar sahəyə yayılıb.
Məlumata görə, Avropa Komissiyası yanğınların söndürülməsinə dəstək məqsədilə Fransanın cənubuna dörd amfibiya tipli yanğınsöndürən təyyarə göndərir.
13:19 07.07.2026
Oxunuş sayı: 61
