İqtisadi xəbərlər

Kriptovalyuta bazarında yeni mərhələ: Azərbaycanda hüquqi baza formalaşdırılır

Azərbaycanda rəqəmsal maliyyə bazarının hüquqi çərçivəsinin formalaşdırılması istiqamətində mühüm addım atılır. Belə ki, 2026-cı ilin sonunadək virtual aktivlər və kriptovalyuta bazarının tənzimlənməsini nəzərdə tutan qanunun qəbul ediləcəyi gözlənilir. Artıq Azərbaycan Mərkəzi Bankı qanun layihəsinin yekun variantını hazırlayaraq aidiyyəti dövlət qurumlarına təqdim edib. Yeni hüquqi çərçivənin kriptovalyuta bazarına hansı yenilikləri gətirəcəyi, investorlar və bu sahədə fəaliyyət göstərən şəxslər üçün hansı imkanları yaradacağı maraq doğurur. Bu baxımdan sual yaranır: qəbul edilməsi gözlənilən qanunun əhəmiyyəti və mahiyyəti nədən ibarətdir?

Mövzu ilə bağlı iqtisadçı Xalid Kərimli Crossmedia.az-a açıqlama verib:

“Bu qanunun əhəmiyyəti ondan ibarətdir ki, ölkədə kriptovalyuta mininqi, yəni kriptovalyuta istehsalı ilə məşğul olan, həmçinin kriptovalyutanın alqı-satqısını həyata keçirən şəxslər üçün hüquqi baza formalaşdırılacaq. Hazırda bu sahəni tənzimləyən ayrıca qanunvericilik mövcud deyil. Bu gün Azərbaycan vətəndaşları xarici kriptobirjalarda, məsələn, Binance, Coinbase və digər platformalarda alqı-satqı aparmaq üçün vəsaitlərini müxtəlif təyinatlarla xaricə köçürürlər. Yəni insan 1 milyon manatlıq səhm ala bilər, 5 milyon manatlıq əmlak əldə edə bilər, 50 milyon manatlıq şirkət ala bilər, amma 1 manatlıq kriptovalyuta almaq üçün konkret hüquqi əsas yoxdur. Buna görə də vəsaitlər müxtəlif yollarla xaricə göndərilir. Düzdür, qanunvericiliyə əsasən hər bir vətəndaşın öz hesabından müəyyən həddə qədər – hazırda 20 min ABŞ dollarına qədər – xaricə vəsait köçürmək hüququ var. İnsanlar da bu imkandan istifadə edərək vəsaitlərini xarici kriptobirjalara göndərir və alqı-satqı əməliyyatlarını orada həyata keçirirlər”.

İqtisadçı əlavə edib ki, qəbul olunacaq qanunla bu məsələlərin hüquqi əsasları müəyyənləşdiriləcək ki, ölkə daxilində investorlar da kriptovalyuta alıb-sata bilsinlər: “Eyni zamanda kriptovalyuta mininqi ilə bağlı fəaliyyət də hüquqi çərçivəyə salınacaq. Mininq kompüter avadanlıqları vasitəsilə hesablamaların aparılması, məlumat bazalarının işlənməsi və bunun nəticəsində rəqəmsal aktivlərin əldə olunması prosesidir. Böyük ehtimalla qanun kriptovalyuta mininqi ilə bağlı fəaliyyətin hüquqi tənzimlənməsini, alqı-satqı qaydalarını və bu sahədə fəaliyyət göstərən subyektlərin hüquq və vəzifələrini müəyyən edəcək. Ümumiyyətlə, belə bir qanunun qəbul olunması müsbət haldır. Hazırda Mərkəzi Bank “sandbox” rejimi tətbiq edir. “Sandbox” rejimi tam hüquqi baza formalaşmasa da, Mərkəzi Bankın müəyyən etdiyi qaydalar çərçivəsində kriptovalyuta sahəsində fəaliyyət göstərən bəzi “exchange” platformalarının, yəni alqı-satqı xidmətləri təqdim edən platformaların məhdud şəkildə fəaliyyətinə imkan verilir. Görünür, indi bununla paralel olaraq qanunvericilik bazası da formalaşdırılır ki, gələcəkdə bu sahənin daha geniş şəkildə tətbiqi və tənzimlənməsi mümkün olsun”.

Ayhan

🖨 Çap et

19:00 29.06.2026

Oxunuş sayı: 49