Hərbi sənaye

London–Bakı hərbi əməkdaşlığında yeni dövr: Müdafiə sənayesində böyük hədəflər

Böyük Britaniyanın Azərbaycana yeni təyin olunmuş səfiri Dunkan Norman "X" sosial şəbəkəsindəki səhifəsində yazıb ki, London Bakı ilə müdafiə sahəsində əməkdaşlığı gücləndirmək niyyətindədir. Böyük Britaniya və Azərbaycan arasında müxtəlif istiqamətlərdə əməkdaşlıq illərdir inkişaf edən xətt üzrə davam edir. Dövlətlər arasında müdafiə sənayesi üzrə əməkdaşlıq isə xüsusən Azərbaycanın suverenliyinin bərpasından sonra başladı. Yeni əməkdaşlıq istiqamətinin inkişaf etdirilməsi tərəflərə yeni hədəflər və böyük layihələr vəd edir.

Mövzu ilə bağlı ekspertlər Crossmedia.az-a açıqlama verib:

Milli Məclisin deputatı Fariz İsmayılzadə bildirib ki, Azərbaycan–Böyük Britaniya münasibətləri hazırda inkişaf mərhələsini yaşayır: “Xüsusilə II Qarabağ müharibəsindən sonra Azərbaycanın müdafiə sənayesinə Avropa ölkələrinin marağı əhəmiyyətli dərəcədə artıb. Bu ölkələr sırasında Böyük Britaniya da yer alır. Hazırda Böyük Britaniya–Azərbaycan parlamentlərarası dostluq qrupunun fəaliyyəti bərpa olunub. Hər iki ölkənin parlament və hökumət nümayəndələri strateji tərəfdaşlığın daha da inkişaf etdirilməsi istiqamətində iş aparırlar. Bu strateji tərəfdaşlıq çərçivəsində bir sıra yeni əməkdaşlıq sahələrinin formalaşdırılması nəzərdə tutulur. Həmin istiqamətlərdən biri də müdafiə sənayesi sahəsidir və bu sahədə yeni istehsal imkanları araştırılır”.

Deputat əlavə edib ki, digər tərəfdən, Azərbaycan Böyük Britaniyanın qabaqcıl texnologiyalarını, o cümlədən süni intellekt həllərini ölkəyə cəlb etmək niyyətindədir: “Bu sahənin inkişaf etdirilməsi Azərbaycan hökumətinin prioritet istiqamətlərindən biridir. Yəni, bu baxımdan hazırda yeni əməkdaşlıq sahələri və yeni imkanlar açılır. Təbii ki, müharibədən əvvəl belə imkanlar mövcud deyildi. Çünki Avropa ölkələri Azərbaycan və Ermənistan arasında balansı qorumaq məqsədilə hərbi əməkdaşlıq məsələsində daha ehtiyatlı davranmağa çalışırdılar. Lakin hazırda vəziyyət dəyişib. Yeni imkanlar yaranıb və bu istiqamətdə müzakirələr davam etdirilir”.

Politoloq Aydın Quliyev isə qeyd edib ki, Britaniya–Azərbaycan hərbi əməkdaşlığını şərti olaraq iki mərhələyə bölmək olar: “Birinci mərhələ 2020-ci il Vətən müharibəsinə qədər olan dövrü, ikinci mərhələ isə müharibədən sonrakı dövrü əhatə edir. Birinci mərhələdə Böyük Britaniya ilə Azərbaycanın hərbi sahədə əməkdaşlığı o qədər də dərin və uzunmüddətli strateji xarakter daşımırdı. Əməkdaşlıq əsasən hərbi-texniki təhsil istiqamətində müəyyən layihələrin həyata keçirilməsi ilə məhdudlaşırdı. Lakin 2020-ci il Vətən müharibəsi başa çatdıqdan və Azərbaycanın ərazi bütövlüyü təmin olunduqdan sonra Böyük Britaniya ilə hərbi-texniki əməkdaşlıq sahəsində yeni və daha geniş bir mərhələ başladı. Təsadüfi deyil ki, məhz müharibədən sonra Böyük Britaniya Azərbaycandakı səfirliyinə hərbi attaşe təyin etdi. Eyni zamanda, Azərbaycana silah və hərbi texnikanın satışı ilə bağlı müəyyən proqram sənədləri də qəbul olundu. Beləliklə, Vətən müharibəsi həm Azərbaycanın xarici hərbi əməkdaşlıq imkanlarını genişləndirdi, həm də Böyük Britaniyanın artıq müharibə vəziyyətindən çıxmış Azərbaycanla müdafiə sahəsində əməkdaşlığını inkişaf etdirməsinə şərait yaratdı”.

Politoloq əlavə edib ki, Qarabağ münaqişəsinin başa çatması və müharibə amilinin aradan qalxması Britaniya ilə Azərbaycanın münasibətlərində enerji əməkdaşlığından kənarda, daha geniş əməkdaşlıq perspektivləri açdı: “Bu yeni istiqamətlərdən biri də məhz hərbi və müdafiə sahəsində əməkdaşlıqdır. Hazırda Azərbaycanın Böyük Britaniya ilə müdafiə sahəsində hər hansı məhdudiyyətlə üzləşməyən əməkdaşlıq siyasəti mövcuddur. Böyük Britaniya da Azərbaycanla hərbi əməkdaşlığın inkişafı baxımından qarşısında hər hansı maneə görmür. Nəzərə alsaq ki, Azərbaycan həm NATO ilə müxtəlif proqramlar çərçivəsində əməkdaşlıq edir, həm də NATO-ya üzv ayrı-ayrı dövlətlərlə müdafiə əlaqələrini dinamik şəkildə inkişaf etdirir, bu baxımdan Böyük Britaniya ilə əməkdaşlıq da həmin siyasətin mühüm tərkib hissəsidir. Beləliklə, Vətən müharibəsindən sonra Azərbaycan ilə Böyük Britaniya arasında müdafiə sahəsində əməkdaşlıq hər iki ölkə üçün açılmış yeni və perspektivli əməkdaşlıq istiqamətlərindən birinə çevrilib”.

Ayhan

🖨 Çap et

20:30 27.06.2026

Oxunuş sayı: 48