ABŞ-Azərbaycan münasibətləri yeni mərhələyə daxil olur - RƏY
Beynəlxalq münasibətlər sistemində köhnəlmiş stereotiplərin və ədalətsiz qərarların regionun yeni geosiyasi reallıqları qarşısında tab gətirə bilmədiyi bir mərhələnin şahidiyik. Azərbaycanın Cənubi Qafqazda yaratdığı yeni status-kvo təkcə regional balansı deyil, həm də okeanın o tayındakı siyasi vektorları yenidən formalaşdırır. ABŞ Konqresinin Nümayəndələr Palatasının üzvü Abraham Hamadenin Bakıya səfəri və rəsmi Bakı ilə keçirdiyi yüksək səviyyəli görüşlər, sadəcə növbəti bir diplomatik təmas deyil; bu, Vaşinqtonun Bakı ilə münasibətlərdə uzun illərdir davam edən süni maneələri-xüsusilə də tarixin arxivinə gömülməli olan 907-ci düzəlişi-tamamilə yenidən dəyərləndirməyə başladığının bariz nümunəsidir.
Məsələ ilə bağlı Milli Məclisin deputatı, Mədəniyyət komitəsinin sədr müavini Günay Əfəndiyeva Crossmedia.az-a açıqlama verib:
"Son günlərin mühüm siyasi hadisələrindən biri Azərbaycan Prezidenti İlham Əliyevin ABŞ Konqresinin Nümayəndələr Palatasının üzvü Abraham Hamadeni qəbul etməsi oldu.
Eyni zamanda Abraham Hamadenin ölkəmizə səfəri çərçivəsində Milli Məclisin Sədri Sahibə Qafarova və xarici işlər naziri Ceyhun Bayramovla keçirdiyi görüşlər də vacib əhəmiyyət kəsb edir.
Bu görüşlər Azərbaycan-ABŞ münasibətlərində müşahidə olunan yeni dinamikanı və qarşılıqlı maraqları əks etdirir.
Xüsusilə diqqət çəkən məqamlardan biri odur ki, Abraham Hamade ABŞ Konqresində vaxtilə Azərbaycana qarşı qəbul edilmiş və uzun illər ikitərəfli münasibətlərə mənfi təsir göstərən Azadlığa Dəstək Aktına 907-ci düzəlişin ləğvi ilə bağlı qanun layihəsinin həmmüəlliflərindən biridir.
907-ci düzəliş Azərbaycana qarşı tamamilə ədalətsiz bir mövqenin göstəricisi idi. Lakin bu gün regionda yeni reallıqlar formalaşıb. Azərbaycan öz ərazi bütövlüyünü və suverenliyini tam bərpa edib, Cənubi Qafqazda sülhün və əməkdaşlığın əsas təşəbbüskarlarından biri kimi çıxış edir. Belə olan halda, köhnə yanaşmaların və artıq aktuallığını itirmiş siyasi qərarların yenidən nəzərdən keçirilməsi təbiidir.
Əlbəttə, ABŞ kimi böyük və mürəkkəb siyasi sistemə malik bir dövlətdə qanunvericilik dəyişiklikləri bir günün işi deyil. Bunun üçün həm Nümayəndələr Palatasında, həm Senatda geniş siyasi dəstək formalaşmalıdır. Müxtəlif baxışlara malik senatorlar və konqresmenlər var və bu proses müəyyən zaman tələb edir.
Lakin artıq belə təşəbbüslərin irəli sürülməsi ikitərəfli münasibətlərin konstruktiv perspektivlərini nümayiş etdirir.
Prezident İlham Əliyevin görüşdə vurğuladığı kimi, ABŞ Prezidenti Donald Trampın ikinci dəfə hakimiyyətə qayıdışından sonra Azərbaycan-ABŞ əlaqələri uğurla inkişaf edir".
O bildirib ki, dövlət başçısının Donald Trampa ünvanladığı təbrik məktubunda Vaşinqtonun vasitəçiliyi ilə regionda sülh gündəliyinin irəli aparılması, Azərbaycan və Ermənistan arasında normallaşma prosesinə verilən dəstək, eləcə də regionda əməkdaşlıq mühitinin möhkəmləndirilməsinə, sabitliyin, təhlükəsizliyin təmin olunmasına yönəlmiş təşəbbüslərin xüsusi əhəmiyyəti qeyd olunur: "Hesab edirəm ki, Abraham Hamadenin Bakıya səfəri, 907-ci düzəlişin ləğvi istiqamətində aparılan müzakirələr və ümumilikdə ABŞ-nin yüksək səviyyəli dövlət rəsmilərinin iştirakları ilə son aylarda müşahidə olunan siyasi dialoq iki ölkənin əlaqələrinin yeni mərhələyə daxil olduğunu göstərən mühüm siqnallardır.
Azərbaycan hər zaman olduğu kimi qarşılıqlı etimada və strateji iş birliyinə əsaslanan münasibətlərin gücləndirilməsinə öz töhfəsini verməyə qadirdir".
Turqut Ansari
13:48 20.06.2026
Oxunuş sayı: 63
