Paşinyanın qələbəsi İlham Əliyevin strateji vizyonu sayəsində mümkün oldu -Sensasion açıqlama
Ermənistanda keçirilən son parlament seçkilərinin nəticələri təkcə ölkədaxili siyasi proses kimi deyil, həm də Cənubi Qafqazda formalaşan yeni regional düzənin növbəti göstəricisi kimi qiymətləndirilir. Seçkilərdə Nikol Paşinyanın sülh və normallaşma gündəliyi ilə əldə etdiyi qələbə bölgədə son illərdə yaranmış yeni geosiyasi reallıqların Ermənistan cəmiyyətinə təsirini bir daha nümayiş etdirdi. Bu kontekstdə bir sıra siyasi yanaşmalara görə, əldə olunan nəticələrin arxasında Azərbaycanın regionda həyata keçirdiyi yeni siyasi kursun və formalaşdırdığı təhlükəsizlik mühitinin də mühüm rolu dayanır.
Mövzu ilə bağlı Milli Məclisin deputatı Azay Quliyev Crossmedia.az-a açıqlama verib: “Paşinyanın parlament seçkilərində inamlı qələbə qazanmasının ən mühüm səbəbi Ermənistan cəmiyyətinin qalıcı sülhə, sabitliyə və normal gələcəyə olan ehtiyacıdır. Paşinyan seçkilərə məhz sülh platforması ilə qatıldı və seçicilərin ciddi dəstəyini qazandı. Bu sülh gündəliyinin və Azərbaycan-Ermənistan normallaşma prosesinin əsas müəllifi və təşəbbüskarı isə Azərbaycan Prezidenti İlham Əliyevdir.
Bu baxımdan seçkilərin nəticəsini ilk növbədə İlham Əliyevin Cənubi Qafqazın gələcəyi ilə bağlı həyata keçirdiyi siyasi xəttinin və strateji baxışının növbəti uğuru və qələbəsi kimi qiymətləndirilməlidir. Belə ki, 2020-ci ildə Vətən müharibəsində qazanılmış tarixi Zəfərdən və 2023-cü ildə Qarabağda separatizmə birdəfəlik son qoyduqdan sonra Azərbaycanın regionda yaratdığı yeni geosiyasi reallıq, dəyişdirdiyi güc balansı və irəli sürdüyü təhlükəsizlik arxitekturası Ermənistanda keçirilən seçkilərdə də öz təsdiqini tapdı və seçicilərin əhəmiyyətli hissəsi tərəfindən dəstəkləndi. Bu qələbə eyni zamanda onilliklər ərzində Ermənistanın ictimai-siyasi düşüncəsində kök salmış xəstə “miatsum” ideologiyasının, son illərdə isə bölgəni yenidən qarşıdurma məkanına çevirməyə çalışan revanşist dairələrin, eləcə də xarici qüvvələrin 200 illik “parçala və hökm sür” siyasətinin iflası və ağır məğlubiyyətidir”.
Deputatın fikrincə, Ermənistan vətəndaşlarının seçimi göstərir ki, cəmiyyətin böyük bir hissəsi yeni müharibə çağırışlarından, ərazi iddialarından və qarşıdurma siyasətindən daha çox sülhə, iqtisadi inkişafa, təhlükəsizliyə və regional əməkdaşlığa üstünlük verir: “Bundan sonra Cənubi Qafqazda yeni mərhələnin – sülhün, qarşılıqlı etimadın, iqtisadi inteqrasiyanın, nəqliyyat və kommunikasiya əlaqələrinin genişlənməsinin, regional əməkdaşlığın möhkəmlənməsi mərhələsinin başlanması üçün daha əlverişli şərait yaranır. Lakin qarşıda Ermənistan cəmiyyətini və siyasi hakimiyyətini daha bir mühüm sınaq gözləyir: Azərbaycana qarşı ərazi iddialarını özündə ehtiva edən konstitusiya müddəalarının dəyişdirilməsilə regionda uzun illər davam etmiş düşmənçiliyin hüquqi qalıqlarının və sülh müqaviləsinin imzalanması yolunda olan sonuncu maneənin aradan qaldırılması. Seçkilərin nəticələri göstərir ki, Ermənistan cəmiyyəti bu istiqamətdə atılacaq addımlara əvvəlki dövrlərlə müqayisədə daha hazırdır və buna alternativin olmadığının fərqindədir”.
Ayhan
16:45 09.06.2026
Oxunuş sayı: 57
